کیا کیجئے رونے کے ہی ساماں نہیں بنتے

[UmerAmer]

کیا کیجئے رونے کے ہی ساماں نہیں بنتے


کیا کیجئے رونے کے ہی ساماں نہیں بنتے
اب ریت کے گھر بھی تو مری جاں نہیں بنتے

بڑھ بڑھ کے نہ یوں وار درختوں پہ کیا کر
اے تیز ہوا! گھونسلے آساں نہیں بنتے

کیوں پوچھتے ہو مجھ سے عذابِ شبِ ہجراں
ہر بات سمجھتے ہوئے ناداں نہیں بنتے

شہروں میں اگر دِل نہیں لگتا ہے تو کیا ہے
بے سُود تو یہ دشت و بیاباں نہیں بنتے

تصویر میں ڈھلتا نہیں وہ پیکرِ خوش خط
بنتے بھی ہیں جو نقش نمایاں نہیں بنتے

شمشیر وہ کاغذ پہ اتاروں بھی تو کیسے
جو نقش سرِ حلقہء امکاں نہیں بنتے