ندامت کے آنسو (افسانچہ

**intelligent086** · 09-14-2015, 12:48 AM

یسریٰ مریم
کسی گاؤں میں ایک بیوہ رہتی تھی۔ اس کے دو بیٹے تھے۔ بڑا بیٹا اپنے بیوی بچوں سمیت ماں کے ساتھ گاؤں میں ہی رہتا تھا جب کہ چھوٹا بیٹا اپنی بیوی کے ساتھ شہر میں رہتا تھا۔ ماں کچھ مہینے گاؤں میں بڑے بیٹے کے ساتھ رہتی اور کچھ مہینے شہر میں چھوٹے بیٹے کے ساتھ گزارتی۔ بڑی بہو تیز طرار عورت تھی۔ اسے اپنی ساس کا اپنے گھر میں رہنا بْرا لگتا تھا۔ چھوٹا بیٹا اکثر ماں سے ملنے گاؤں آجاتا۔ وہ ماں کا بہت خیال رکھتا اور ماں سے اپنے گھر میں رہنے کو کہتا، مگر ماں کا دِل گاؤں میں لگتا تھا، اس لئے وہ انکار کردیتی۔ بڑی بہو ساس سے پیچھا چھڑانے کے طریقے سوچتی رہتی۔ ایک دن اس نے اپنی ساس سے کہا ’’اماں! میری طبیعت خراب ہے اور مجھے آرام کی ضرورت ہے۔ گھر کے سارے کام آج آپ کیجئے‘‘۔ ساس نے گھر کے سارے کام اکیلے کئے۔ بچوں کو ناشتہ کرایا، سکول بھیجا، پھر ان کے آنے پر انھیں کھانا کھلایا۔ غرض، ماں نے گھر کے سارے کام خوش اسلوبی سے نمٹا دیئے۔ بہو کو اب آرام کا چسکا پڑگیا۔ وہ اب آئے دن کوئی نہ کوئی بہانہ گھڑتی اور بیمار بن جاتی۔ یوں بیچاری بوڑھی ساس کو گھر کے سارے کام کرنے پڑتے۔ ایک دن چھوٹا بیٹا گاؤں آیا ہوا تھا۔ اس نے جو یہ سب کچھ دیکھا تو اسے بہت غصہ آیا اور وہ ماں کو اپنے ساتھ شہر لے گیا۔ بڑی بہو نے پھر بیماری کا ڈھونگ رچاتے ہوئے اپنے شوہر سے کہا کہ میری طبیعت خراب ہے۔ شہر جاکر اماں کو لے آؤ، اس نے یہ بھی کہا ’’میرے خواب میں پیر صاحب آئے تھے۔ انھوں نے بتایا ہے کہ میری بیماری صرف اس طرح دْور ہوسکتی ہے کہ میری ساس منہ کالا کرکے اور سر منڈواکر میرے پلنگ کے گرد سات چکر لگائے! شوہر بیوی کا منصوبہ سمجھ چکا تھا۔ اس نے ایک ترکیب سوچی اور اپنی ماں کو لینے کی بجائے اپنی ساس کے گھر چلا گیا اور اپنی ساس سے کہا ’’اماں! آپ کی بیٹی بہت بیمار ہے، اسے پیر صاحب نے کہا ہے کہ تم اپنی بیٹی کے بستر کے گرد سات چکر لگاؤ تو وہ ٹھیک ہوجائے گی!‘‘ بیٹی کی بیماری کا سن کر ماں فوراً چلنے کے لئے تیار ہوگئی۔ واپسی میں راستے میں جنگل آگیا۔ وہاں پہنچ کر داماد نے ساس سے کہا ’’اماں! پیر صاحب نے یہ بھی کہا تھا کہ چکر لگاتے وقت ماں کا منہ کالا اور سر گنجا ہونا چاہئے، تب اس کی بیماری جائے گی‘‘۔ بڑی بی، بیٹی کی محبت میں منہ پر کالک مل کر گنجی ہوگئیں۔ جب دونوں گھر پہنچے تو رات ہوچکی تھی۔ بیوی پلنگ پر لیٹی تھی۔ ماں نے آتے ہی پلنگ کے گرد چکر لگانے شروع کردیئے۔ شوہر چادر اوڑھ کر لیٹ گیا۔ جب ساتواں چکر پورا ہوا تو بیٹی پلنگ سے اْٹھ کر بیٹھ گئی اور بولی ’’دیکھا، سمجھ داروں کی سمجھ داری!‘‘ شوہر منہ سے چادر ہٹائے بغیر بولا ’’غور سے دیکھنا، ماں تمہاری ہے یا ہماری!‘‘ اب جو اس نے غور سے دیکھا تو بولی ’’اماں! یہ آپ ہیں؟‘‘ اماں افسردہ لہجے میں بولیں ’’ہاں، بیٹی! یہ میں ہوں!‘‘ اور پھر وہ دونوں پھوٹ پھوٹ کر ندامت کے آنسو بہانے لگیں۔ ٭…٭…٭