وہ اس ادا سے جو آۓ تو یوں بھلا نہ لگے

[intelligent086]

وہ اس ادا سے جو آۓ تو یوں بھلا نہ لگے


ہزار بار ملو پھر بھی آشنا نہ لگے

کبھی وہ خاص عنایت کہ سَو گُماں گزریں
کبھی وہ طرزِ تغافل کہ محرمانہ لگے

وہ سیدھی سادی ادائیں کہ بجلیاں برسیں
وہ دلبرانہ مروّت کہ عاشقانہ لگے

دکھاؤں داغِ محبّت جو نا گوار نہ ہو
سناؤں قصّۂ فرقت اگر برا نہ لگے

بہت ہی سادہ ہے تو اور زمانہ ہے عیّار
خدا کرے کہ تجھے شہر کی ہوا نہ لگے

بجھا نہ دیں یہ مسلسل اداسیاں دل کی
وہ بات کر کہ طبیعت کو تازیانہ لگے

جو گھر اجڑ گۓ ان کا نہ رنج کر پیارے
وہ چارہ کر کہ یہ گلشن اُجاڑ سا نہ لگے

عتابِ اہلِ جہاں سب بھُلا دۓ لیکن
وہ زخم یاد ہیں اب تک جو غائبانہ لگے

وہ رنگ دل کو دۓ ہیں لہو کی گردش نے
نظر اُٹھاؤں تو دنیا نگار خانہ لگے

عجیب خواب دکھاتے ہیں ناخدا ہم کو
غرض یہ ہے کہ سفینہ کنارے جا نہ لگے

لیے ہی جاتی ہے ہر دم کوئ صدا ناصر
یہ اور بات سراغِ نشانِ پا نہ لگے

Similar Threads:

• ہر پل دھیان میں بسنے والے، لوگ فسانے ہوجات
• گلی گلی آباد تھی جن سے کہاں گئے وہ لوگ
• ستم سکھلاۓ گا رسمِ وفا، ایسے نہیں ہوتا
• کچھ اس ادا سے آج وہ پہلو نشیں رہے
• دیے جلاتے ہوۓ صبح و شام رکھتے تھے