اورنگزیب عالمگیر کے لیے ایرانی تحائف

**intelligent086** · 01-11-2016, 01:20 PM

ایرانی سفیر نے اپنے وعدوں کو نظر انداز کر کے اور مغلیہ رواج کو پس ِپشت ڈال کے اورنگ زیب کو ایرانی طرز پر اپنے سینے پر ہاتھ رکھ کر سلام کیا۔ یہ دیکھ کر دربار میں موجود اس کام پر مامور چار مضبوط آدمی آگے بڑھے، دونے اس کے ہاتھ پکڑے دو نے اس کی گردن اور بلا کسی قوت یا تشدد کو استعمال کئے، گویا وہ محض طریقہ سکھا رہے ہوں۔ انہوں نے اس کے ہاتھ نیچے کئے اور گردن جھکادی اور کہا: ’’مغل دربار میں کورنش بجا لانے کا یہ طریقہ ہے‘‘۔ اس پر سفیر نے فراست سے کام لیا اور بلا کسی جدوجہد کے اپنا پورا جسم جھکا دیا اور ہندوستانی رواج کے مطابق کورنش بجا لایا اور دیگر رسم و رواج کے بعد اس نے شاہ ِایران کی طر ف سے بھجوائے گئے تحائف پیش کئے۔ تحفوں میں ستائیس قد آور اور مضبوط گھوڑے تھے۔ان میں نو گھوڑے قیمتی پتھروں سے آراستہ تھے اور ان کی ’’زینیں ‘‘ موتیوں سے مرصع تھی۔ باقی ماندہ گھوڑوں پر کمخواب کے جھول تھے۔ اٹھارہ قد آور اور بالوں والے اونٹ تھے، جو ہندوستان اور بلخ کے اونٹوں سے زیادہ لمبے تھے۔ ساٹھ صندوق عرق گلاب کے تھے۔بیس صندوق بید مشک کے تھے۔ بارہ خوبصورت قالینیں تھیں، جن کا طول بائیس فٹ اور عرض آٹھ فٹ تھا،جو بہت ہی نفیس تھیں۔ چار صندوقوں میں ’دزر عفت‘‘ کے تھان تھے، جو بہت عمدہ اور قیمتی تھے۔ چار جڑائو چھوٹی تلواریں اور چار جڑائو خنجر تھے۔ ایک سربمر سونے کا بکس تھا، جس میں شیراز کے پہاڑوں کا ’’من‘‘ تھا۔ (داستان ِ مغلیہ از نکولائو مانوچی) ٭…٭…٭