اللہ کے سپاہی . . . تاریخ اسلام کا دلچسپ واقعہ

**intelligent086** · 04-20-2015, 02:59 AM

تاریخ اسلام یوں تو جنگ کی سختیوں، فتح کی بشارتوں اور ایسی مثالوں پر مبنی ہے کہ دل میں خود بخود خوشی پھوٹ اٹھتی ہے کہ چلو ہماری بہار تو ایسی تھی کہ سن کر اور پڑھ کر انسان خوش ہو سکتا ہے۔انہیں واقعات میں ہمیں ایسے واقعات کی شبیہہ بھی نظر آتی ہے ۔ ان میں سے ایک واقعہ حاضر خدمت ہے۔ پہلے کا تعلق فتح ایران کی سب سے بڑی جنگ یعنی جنگِ قادسیہ سے ہے۔ رستم کا نام سب نے ہی سن رکھا ہے۔ قادسیہ کی جنگ میں ایرانی فوج کا سپہ سالار یہی رستم تھا۔ یہ جنگ مدائن کے باہر قادسیہ کے میدانوں میں لڑی گئی تھی۔ بعض مورخین کا کہنا ہے کہ اس نے کوئی خواب دیکھا تھا جس کے بعد وہ تذبذب کا شکار ہو چکا تھا اور اسی لئے اس جنگ کو ٹالنا چاہ رہا تھا۔ خیر پہلے دن ساٹھ ہزار کا لشکرلے کر رستم قادسیہ کے میدان میں مسلمانوں کی فوج کے سامنے ڈیرے ڈالے ہوئے تھا۔ اس نے اپنا ایک ایلچی حضرت سعد کے پاس یہ کہہ کر بھیجا کہ آپ اپنا کوئی معتمد بھیجیں ،میں مصالحانہ گفتگو کرنا چاہتا ہوں۔ حضرت سعد نے ربعی بن عامر کو مسلمانوں کی جانب سے بھیجا۔ ربعی بن عامر گھوڑا دوڑاتے ہوئے ایرانیوں کے لشکر میں داخل ہوئے، اس سے قبل رستم اپنے لشکر کو قوت اور شان و شوکت کا مظاہرہ کرنے کا حکم دے چکا تھا چنانچہ ربعی کے راستے میں ایرانی فوج کے ہاتھی اور پیادہ فوج کھڑی تھی۔ پڑاؤ کے درمیان ایک شامیانے کو حریر اور اطلس کے پردوں اور موتیوں سے سجایا گیا تھا۔ شامیانے کے درمیان رستم کا سنہری تخت تھا جس کے اوپر چھت کو سونے اور ہیرے کی جھالروں سے سجایا گیا تھا۔ فرش پر بیش قیمت قالین تھے اور ان پر گاؤ تکیے موجود تھے جن پر زربفت کے غلاف چڑھائے گئے تھے۔ یہ ایک عظیم سلطنت کے ظاہری ساز و سامان کی نمائش تھی لیکن ربعی جس شان سے آئے انہیں دیکھنے والے دم بخود رہ گئے۔ ان کا لباس موٹا اور کھردرا تھا۔ ان کی زرہ ایران کے ایک ادنیٰ سپاہی کے قابل بھی نہ تھی۔ ان کی تلوار کی نیام پر چیتھڑے بندھے ہوئے تھے۔ وہ گھوڑا دوڑاتے ہوئے شامیانے تک پہنچ کر اترے پھر اپنے نیزے سے قالین کے کونے میں سوراخ کیا۔ پھر اپنے گھوڑے کی لگام اس میں اٹکانے کے بعد تخت کے قریب پہنچ کر اس کے سامنے نیزہ گاڑا اور تخت پر رستم کے برابر آکر بیٹھ گئے۔رستم کے آدمیوں نے ان کو تخت سے اتارنے اور ان کے ہتھیار چھیننے کی کوشش کی تو انہوں نے کہا ‘‘میں تمہاری دعوت پر یہاں آیا ہوں۔ ہمارے مذہب میں اس بات کی اجازت نہیں کہ کوئی تخت پر خدا بن کے بیٹھے اور دوسرے بندے اس کے سامنے ہاتھ باندھ کر کھڑے ہو جائیں۔ اگر تم کو میرا یہاں بیٹھنا گوارا نہیں تو میں جاتا ہوں’’۔ رستم نے اپنے آدمیوں کو منع کیا اور وہ دور ہٹ گئے۔ پھر ربعی کے دل میں کوئی خیال آیا اور وہ تخت سے اترے اور اپنے خنجر سے قالین کا ایک ٹکرا کاٹا اور زمین پر بیٹھتے ہوئے کہا ’’ میں اللہ کی قدرتی زمین کو اس مصنوعی زمین پر ترجیح دیتا ہوں۔ اس کے بعد ان کے اور رستم کے درمیان نوک جھونک جاری رہی جب وہ باہر نکلے تو ایک افسر نے کہا ‘‘تم ان تلواروں کے ساتھ ایران فتح کرو گے؟’’ ربعی نے جواب دیا تم نے صرف نیام دیکھی ہے تلوار نہیں اور یہ کہہ کر انہوں نے تلوار باہر نکال لی اور دیکھنے والوں کی آنکھوں میں بجلی کوند گئی۔اس کے بعد ایک سپاہی نے اپنی ڈھال پیش کی اور کہا کیا تم اس کو کاٹ سکتے ہو؟ اس کے بعد ربعی کی تلوار میں جنبش ہوئی اور سپاہی کی ڈھال کے پرخچے اڑ گئے۔ ربعی گھوڑے پر سوار ہو گئے اور یہ کہہ کر اسلامی لشکر کی جانب پلٹ گئے کہ میں میدانِ جنگ میں تمہیں مایوس نہیں کروں گا۔ (نیٹ سے ماخوذ) ٭…٭…٭