خوشبوؤں کی دنیا...!

**intelligent086** · 03-26-2015, 11:05 AM

خوشبوؤں کی دنیا...!

زرتاشہ میر
کیا آپ کو کبھی اس بات کا تجربہ ہوا ہے کہ کسی خوشبو کو سونگھ کر اچانک آپ کے ذہن میں کوئی خوشگوار یاد تازہ ہوگئی؟ اگر ہاں تو سائنس بھی اس بات کی تصدیق کرتی ہے کہ مخصوص مہک انسان کو اس کے سنہرے دور میں واپس لے جاتی ہے،مگر بات یہیں پر ختم نہیں ہوتی بلکہ کچھ خاص خوشبوئیں ہمارے ذہن اور جسم پر بھی حیرت انگیز اثرات مرتب کرتی ہیں۔تناؤ سے لیکر سر درد، خوشی، نیند غرض متعدد مثبت بہتری کیلئے یہ خاص خوشبوئیں ہمارے لئے بہت فائدہ مند ثابت ہوتی ہیں۔ درج ذیل میں ایسی ہی دس خوشبوؤں کا ذکر ہے، جو ماحول مہکانے کے ساتھ ساتھ ہمارے جسم و ذہن کیلئے بھی فائدہ مند ثابت ہوتی ہیں۔ لیونڈر کی مہک نیند کیلئے فائدہ مند!:لیونڈر نامی پھول کی مہک ذہن اور جسم کو فوری طور پر سکون کا احساس پہنچاتی ہے، خاص طور پر بے خوابی کے افراد کیلئے تو یہ بہت فائدہ مند ہے۔ ایک تحقیق میں یہ بات سامنے آئی ہے کہ جامنی رنگ کے ان پھولوں کی خوشبو نیند کے مسائل کیلئے انتہائی موثر ثابت ہوتی ہے۔ دارچینی کی مہک ذہن تیز کرتی ہے:یہ میٹھی مہک والی بوٹی آپ کی دماغی طاقت کو بڑھاتی ہے۔ ایک امریکی یونیورسٹی ویلنگ جسیوٹ یونیورسٹی کی تحقیق میں یہ بات سامنے آئی تھی کہ دارچینی کی خوشبو سونگھنے سے دماغی افعال جیسے یادداشت، توجہ اور دیکھ کر ردعمل جیسی صلاحیتیں بہتر ہوتی ہیں۔ صنوبر کی خوشبو تناؤ کم کرتی ہے:پائن یا صنوبر کی مہک ہماری تشویش یا فکر کو کم کرتی ہے۔ ایک جاپانی تحقیق کے مطابق صنوبر کے درختوں کے آس پاس گھومنے سے تناؤ اور مایوسی کی شرح کم ہوتی ہے اور اعصاب کو سکون محسوس ہوتا ہے، اس کے علاوہ تحقیق میں مزید یہ بات سامنے آئی ہے کہ اس مہک کے اثر سے فوری طور پر ذہنی سکون کا احساس ہوتا ہے۔ گھاس کی خوشبو بنائے خوش باش! تازہ گھاس کی مہک آپ کو خوشی کا احساس دیتی ہے، ایک تحقیق کے مطابق اس مہک سے ایسا کیمیکل خارج ہوتا ہے جس سے لوگوں کو خوشی اور سکون کا احساس ہوتا ہے۔یہ خوشبو عمر بڑھنے کے ساتھ ذہنی تنزلی کی روک تھام میں بھی مددگار ثابت ہوتی ہے۔ ترش پھلوں کی مہک دلائے توانائی کا احساس ! اگر آپ ذہنی طور پر زیادہ بہتر کارکردگی کے خواہش مند ہیں تو کافی یا چائے کی بجائے ترش پھلوں کا انتخاب کریں۔ لیموں اور مالٹے صرف وٹامن سی کی وجہ سے ہی جانے نہیں جاتے بلکہ ان دونوں کی مہک کو سونگھنے سے بھی توانائی اور چوکسی کا احساس بڑھتا ہے۔ ونیلا کی خوشبو مزاج کو بہتر بناتی ہے: ونیلا کی خوشبو خوشی کا احساس بڑھاتی ہے، اس کو سونگھنے سے خوشی اور سکون کا احساس ہوتا ہے اور مزاج خوشگوار ہوتا ہے۔ پودینہ کی مہک ارتکاز بڑھاتی ہے:سانسوں کی تازگی کے ساتھ ساتھ پودینے کی خوشبو دماغ کیلئے فائدہ مند ہے، ایک تحقیق کے مطابق پودینے کی مہک کا دماغی اسٹیمنا، عزم اور مجموعی کارکردگی سے تعلق ہے، جو ارتکاز کی صلاحیت بڑھاتی ہے۔ چنبیلی کی خوشبو ڈپریشن یا مایوسی کم کرنے میں مددگار:چنبیلی کے پھول کی مہک ذہن کو ہوشیار تو کرتی ہے، مگر یہ مایوس کن خیالات کی روک تھام میں بھی مددگار ثابت ہوتی ہے۔ ایک تحقیق میں یہ بات سامنے آئی ہے کہ چنبیلی کے تیل کی مہک سے ڈپریشن سے ریلیف ملتا ہے اور مزاج خوشگوار ہوتا ہے۔ سیب کی خوشبو آدھے سر کے درد کیلئے موثر!کہا جاتا ہے کہ ایک سیب کا روزانہ استعمال دور رکھے ڈاکٹروں سے اور یہ بات کم از کم سردرد کی حد تک تو بالکل درست ہے کیونکہ سیب کی خوشبو سر درد کی روک تھام کیلئے بہت مفید ہے۔ تحقیق کے مطابق اس پھل کی خوشبو سے مائیگرین یا آدھے سر کے درد کو کم کرنے میں مدد ملتی ہے۔ زیتون کا تیل کی مہک بھوک روکنے میں مددگار! زیتون کے تیل کی مہک سے پیٹ بھرنے کا احساس ہوتا ہے یا جنک فوڈ کی خواہش کم ہوجاتی ہے۔ کھانے کے بعد اسے سونگھنے سے پیٹ بھرنے کا احساس ہوتا ہے، جبکہ یہ خوشبو بلڈ شوگر کا لیول کم کرنے میں بھی مددگار ثابت ہوتی ہے۔ ٭…٭…٭