ب 1بلاول بھٹو لاہور کیوں نہ آئے؟

**intelligent086** · 12-11-2014, 08:20 AM

بلاول بھٹو زرداری کو پاکستان کے سیاسی میدان میں باضابطہ طور پر اُتارنے کیلئے کروڑوں روپے خرچ کرکے کراچی میں بڑے اجتماع کا اہتمام کیا گیا۔ تحریک انصاف کی سونامی کے تناظر میں یہ ایک دانشمندانہ فیصلہ تھا۔ اس تاریخی اجتماع میں بلاول نے ولولہ انگیز خطاب کیا جسے خیبر سے کیماڑی تک بڑی توجہ سے سنا گیا۔ بلاول نے پی پی پی کے حامیوں کو یقین دلایا کہ وہ بھٹو ہیں زرداری نہیں ہیں۔ انہوں نے اعلان کیا کہ وہ اپنے سیاسی سفر کا آغاز بے نظیر بھٹو کی شہادت سے کرینگے۔ بلاول کے پرجوش خطاب نے بھٹو کے نظریاتی مخالفین کو تشویش میں مبتلا کردیا۔ بلاول نے اعلان کیا کہ وہ 30 نومبر پارٹی کے یوم تاسیس کے موقع پر بلاول ہائوس لاہور میں ورکرز کنونشن کرینگے جس میں کارکنوں کو اظہار خیال کا موقع دیا جائیگا۔ کنونشن کامیاب بنانے کیلئے پی پی پی کے پرانے جیالے ڈاکٹر جہانگیر بدر کو بلاول کا پولیٹیکل سیکریٹری اور کنونشن کا چیف کوآرڈی نیٹر نامزد کیا گیا۔ بلاول کی تربیت چونکہ بے نظیر بھٹو شہید نے کی اس لیے وہ مزاج کے اعتبار سے اینٹی سٹیٹس کو ہیں جبکہ زرداری خاندان سٹیٹس کو کا حامی ہے۔ آصف علی زرداری اور بلاول بھٹو کے درمیان یہ بنیادی تضاد ابھر کرسامنے آنے لگا ہے۔ بلاول نے ایک انقلابی اور وژنری لیڈر کے طور پر تھر میں بچوں کی افسوسناک اموات پر وزیراعلیٰ سندھ قائم علی شاہ سے جواب طلبی کرلی۔ بلاول کے ان انقلابی نوعیت کے فیصلوں نے پی پی پی کے لاکھوں جیالوں کی مایوسی کو ختم کیا مگر پارٹی کا کرپٹ گروپ بوکھلا گیا۔ اسی گروپ نے بلاول کا راستہ روکنے کیلئے سازش تیار کی۔ اس سازش کے تحت آصف زرداری کو باور کرایا گیا کہ پی پی پی کے پرانے لیڈر ان کو قیادت سے ہٹانے کی منصوبہ بندی کررہے ہیں اور یوم تاسیس کے موقع پر بلاول بھٹو کی موجودگی میں اس منصوبے پر عمل کیا جائیگا۔ آصف علی زرداری پارٹی کے اندر عوامی مقبولیت نہ ہونے کی وجہ سے کرپٹ مافیا کے جال میں آگئے اور انہوں نے بلاول بھٹو کو لاہور آنے سے روک کر پی پی پی کو ایک نئی آزمائش میں مبتلا کردیا۔ آصف علی زرداری اپنے دل کا خوف نہ چھپا سکے اور ایک خطاب میں کہہ دیا کہ پارٹی کے اندر ’’بھیڑئیے‘‘ ان کی قیادت تبدیل کرنا چاہتے ہیں حالانکہ ’’وصیت میں میرا نام ہے بلاول کا نہیں ہے‘‘۔ سیاسی حلقے حیران ہیں کہ آصف علی زرداری سات سال پی پی پی کے مختار کل چیئرمین اور طاقتور صدر پاکستان رہے مگر وہ آج بھی اس وصیت کا سہارا لے رہے ہیں جس کے بارے میں جیالوں کے ذہنوں میں شکوک و شبہات پائے جاتے ہیں۔
یوم تاسیس کے موقع پر ’’بلاول کیوں نہیں آئے‘‘ کا سوال سیاسی اور سفارتی حلقوں میں گردش کرتا رہا۔ لاہور میں ایشیائی پارلیمنٹ کے غیر ملکی ارکان پی پی پی کے لیڈروں سے بلاول کے بارے میں پوچھتے رہے۔ سفارتکاروں نے فون کرکے بلاول کے بارے میں استفسار کیا۔ جیالے پریشان اور مایوس تھے آخر کار کنونشن میں ایک جیالے نے آصف علی زرداری سے پوچھ لیا کہ ’’بلاول کیوں نہیں آئے‘‘۔ آصف علی زرداری کوئی جواب نہ دے سکے۔ کنونشن اور پارٹی اجلاسوں میں بلاول بھٹو کے نعرے لگتے رہے اور ان کی تعریف ہوتی رہی۔ آصف علی زرداری باپ کی حیثیت میں خوش ہوئے مگر قائد کی حیثیت میں انہیں اجنبیت کا احساس ہوا۔ آصف علی زرداری انجانے خوف میں مبتلا رہے ہیں۔ صدارت کا منصب سنبھالنے کے بعد جب انہوں نے گورنر ہائوس میں سینئر صحافیوں کی محفل میں بڑی شفقت سے میرا ہاتھ اپنے ہاتھ میں تھاما اور میں نے اپنا ہاتھ ان کے ہاتھ چھڑانے سے پہلے چھڑا لیا تو وہ میرے دل کی کیفیت کو سمجھ گئے۔ بے نظیر بھٹو کے سابق ترجمان منور انجم نے بڑے شوق کے ساتھ آصف زرداری پر لکھے گئے کالموں کی کتاب مرتب اور شائع کرکے آصف زرداری کی خدمت میں پیش کی۔انہوں نے کتاب کے سرورق پر بھٹو اور بے نظیر کیساتھ اپنی تصویر نہ دیکھ کرناراضگی کا اظہار کیا اور اس طرح منور انجم کا سیاسی مستقبل مخدوش ہوگیا۔ پرانے جیالے کی حیثیت میں جب میں نے پارٹی لیڈروں سے رابطے کیے تو بہت سے انکشافات سامنے آئے۔
آصف علی زرداری نے بلاول ہائوس میں پارٹی لیڈروں کو اعتماد میں لیتے ہوئے بتایا کہ ’’بلاول نوجوان اور جذباتی ہے سیاست اسکے خون میں شامل ہے اسکو سیاسی فہم کیلئے وقت چاہیئے س لیے اسے کچھ عرصہ سیاسی سرگرمیوں میں حصہ لینے سے روک دیا ہے‘‘۔ آصف علی زرداری کا موقف یہ ہے کہ عمران خان کی بچگانہ اور جذباتی تحریک کی وجہ سے جمہوریت کو خطرات لاحق ہیں اس لیے پی پی پی کو جمہوریت کی بقا کے لیے مفاہمت کی سیاست پر عمل کرنا چاہیئے۔ موجودہ حالات کے تناظر میں آصف علی زرداری کا موقف قابل فہم ہے مگر بے نظیر بھٹو شہید کی ٹیم کے اہم رفقاء ناہید خان اور ڈاکٹر صفدر عباسی کہتے ہیں کہ جب تک پی پی پی سندھ میں اقتدار میں ہے آصف زرداری پارٹی امور میں دلچسپی لیتے رہیں گے۔ اقتدار ختم ہوتے ہی پارٹی سے لاتعلق ہوجائینگے۔ آصف علی زرداری کی سیاست بلاول بھٹو اور پی پی پی کیلئے خطرناک ہے۔پنجاب کی سیاست کے پرانے کھلاڑی کہتے ہیں کہ شریف خاندان بلاول بھٹو سے خوفزدہ ہے۔ عمران کے ساتھ اگر بلاول بھٹو بھی پنجاب کے سیاسی میدان میں کود پڑیں تو شریف خاندان کا سیاسی مستقبل تاریک ہوجائیگا۔ پی پی پی کے اندر قبضہ گروپ نہیں چاہتا کہ بلاول پنجاب میں آئیں۔پارٹی کے ایک رہنما نے نام ظاہر نہ کرنے کی شرط پر بتایا کہ پی پی پی پنجاب ایگزیکٹو کے اجلاس میں لطیف کھوسہ نے آصف علی زرداری کو بتایا کہ پیرس میں جہانگیر بدر کی کتاب کی تقریب رونمائی بلاول بھٹو کی صدارت میں ہوئی جس میں یورپی ممالک کے پارٹی عہدیدار شریک تھے۔ جب وہ (لطیف کھوسہ) بلاول کے ساتھ والی نشست پر بیٹھ گئے تو بلاول نے ان کو اس نشست سے اُٹھا دیا۔ اگر یہ خبر درست ہے تو اس کا مطلب یہ ہے کہ بلاول بھٹو اپنے دائیں بائیں بھٹو اور بے نظیر کے نظریاتی ساتھیوں کو دیکھنا چاہتے ہیں۔ اسی اجلاس میں آصف علی زرداری نے جہانگیر بدر کو انتباہ کیا کہ اگر بلاول نے کوئی ایسی ویسی حرکت کی تو ذمے داری تم پر ہوگی۔ جنوبی پنجاب کے اجلاس میں جب سابق وزیراعظم یوسف رضا گیلانی کے صاحبزادے نے آصف علی زرداری کے سامنے شکایت کی تو انہوں نے جو جواب دیا اس سے ظاہر ہوا کہ آصف علی زرداری اور یوسف رضا گیلانی کے درمیان فاصلے پید اہوچکے ہیں۔ گزشتہ سال اہل حدیث جماعت کے صاف ستھرے سکالر میاں محمد جمیل نے راقم کو مشورہ دیا کہ میں بلاول بھٹو کے قریب رہ کر انکی ذہن سازی کروں کیونکہ وہ مستقبل کے لیڈر ہیں۔ بلاول کا ذہن پختہ ہوچکا ہے۔ پی پی پی کے نظریاتی جیالے خوش ہیں کہ بلاول اصولی اور نظریاتی سیاست پر سمجھوتہ نہیں کریں گے۔ وقت انکے ساتھ ہے وہ انتظار کرسکتے ہیں۔ پی پی پی اگر پارٹی کے سینئر تجربہ کار لیڈر مخدوم امین فہیم کی صلاحیتوں سے فائدہ اُٹھائے تو ایک بار پھر سیاسی افق پر ابھرسکتی ہے۔