اسلام میں حجاب کی اہمیت و حقیقت

**intelligent086** · 10-11-2014, 02:16 AM

پروفیسر ڈاکٹر ثناء خالد، اسلام آباد

کسی بھی مذہب کی تعلیمات اس مذہب کی قوم کے سیرت و کردار کی تشکیل کیلئے مرتب کی جاتی ہیں اور ہر مذہب کے مذہبی اصول وقوانین اس کی مذہبی تعلیم و تربیت کی روشنی میں تہذیب وتمدن کے زیور کے ساتھ مختلف حالتوں میں موجود ہیں۔ تمام مذاہب عالم کی تعلیمات ایک طرف اور دین ِحق اسلام کی تعلیمات ایک طرف ہیں۔ اسلام ایک مکمل ضابطہ اخلاق اور دین فطرت ہے جس کا ہر قانون نہ صرف کردارکی تشکیل کرتا ہے بلکہ فرد ِزندگی کو تحفظ اور روح و قلب کو سکون بھی فراہم کرتا ہے۔ اسلام کے یہ تمام قوانین مرد وزن دونوں پر مساوی نافذ ہوتے ہیں فرق اِن میں صرف صنفی شخصیت کے مطابق ہو تا ہے۔ اسلام نے عورت کیلئے جو احکام و قوانین متعین فرمائے ہیں ان میں سے حجاب یعنی پردے کا حکم نہایت اہم حیثیت کا حامل ہے۔ قدرت کے تمام احکامات کے پیچھے حکمت کار فرما ہے اور اسی میں دراصل انسان کی بھلائی پوشیدہ ہے۔ اگر انسان خود سمجھنا چاہے تو احکامات پردہ بھی بہت حکمتوں سے بھرپور ہیں جو عورت کو تحفظ فراہم کرتے ہیں اور اس میں کوئی برائی نہیں بلکہ یہ تو بے شمار برائیوں سے بچاتے ہیں۔ اہلِ مغرب کی تقلید کرنے والے ،نئے مذہبی روشن خیال اس کو معیوب سجھتے ہیں اور اس کو عورت کے لئے ایک قید تصور کرتے ہیں۔ یہ مغربی ممالک اسلام کی دشمنی میں حجاب و نقاب کو روکنے کے لئے نت نئی پابندیاں نافذ کر کے آئے دن کوئی نہ کوئی نیا بل پاس کرانے کے لئے کوشاں رہتے ہیں۔ یہ ایسا صرف اور صرف اسلام دشمنی میں کرتے ہیں اگر ہم دیگر مذاہب کا مطالعہ کریں تو ہمیں یہ معلوم ہو گا کہ ہندومذہب میں بھی پردے کا تصور موجود ہے ۔ یہ بات قابل ذکر ہے کہ ہندئووں کی کتاب رامائن میں بھی اس کا تصور موجود ہے کہ جب راون سیتا کو اٹھا کر لے جاتا ہے اور رام اس کی تلاش میں مارا مارا پھرتا ہے تو ایسے میں وہ اپنے بھائی لکشمن کو مدد کے لئے بلاتا ہے ،اپنی پریشانی کا ذکر کرتا ہے اور کہتا ہے کہ وہ سیتا کو اس کے ساتھ ملکر تلاش کرے مگر لکشمن اس کے جواب میں انکار کرتا ہے اور کہتا ہے کہ وہ سیتا کو کیسے پہچانے گا اس نے تو اس کا چہرہ بھی نہیں دیکھا کیونکہ سیتا اپنا چہرہ چھپاتی تھی اور جب انہوںنے سیتا کو تلاش کیا تو لکشمن نے سیتا کو اس کے پائوں میں پہنی ہوئی پازیب سے پہچانا۔ اس سے پتہ چلتا ہے کہ ہندو مذہب میں بھی پردے کا تصور تھا اور ان کی مذہبی کتاب میںاس کا ذکر ملتا ہے۔ عورت گھر کی زینت ہے ۔عربی زبان میں لفظ عورت کا مطلب ہی چھپا کر رکھنے والی چیز کے ہیں اور انسانی فطرت ہے کہ وہ اپنی قیمتی اشیاء کو چھپا کر رکھتا ہے نہ کہ اس کی نمائش کی جائے۔ اسلام عورت کو بننے سنورنے یا فیشن کرنے کی قدغن نہیں لگاتا بلکہ یہ سب کچھ کرنے کا پردے میںحکم دیتا ہے۔ زیب و زینت کی جائے مگر حجاب کا خیال رکھا جائے نامحرموں کے سامنے اس کی نمائش سے پرہیز کی جائے تاکہ معاشرہ گناہوں اور گمراہی سے بچا رہے۔ شرم وحیاء ہی تو دراصل عورت کا حقیقی زیور ہے۔ افسوس کہ ہم اسلام کی تعلیمات کو بھلا چکے ہیں اسی وجہ سے ذلت و رسوائی کی طرف جا رہے ہیں اللہ ہمیں اُسوہ ِرسول کریم ﷺ پر عمل پیرا ہونے کی توفیقِ سعید عطا فرمادے۔ آمین ٭…٭…٭