اردو اشعار Urdu Ashaar

تمہارے دل میں میری چاہتوں کا
کوئی تو بیج سا پھوٹا ہوا ہے

کسی کے نام لگ جائے بلا سے
یہ دل پہلے سے ہی ٹوٹا ہوا ہے

ہم تجھے شہر میں یوں ڈھونڈتے ہیں
جس طرح لوگ سکوں ڈھونڈتے ہیں

ہم گو منصور نہیں ہیں لیکن
اس کا انداز جنوں ڈھونڈتے ہیں

جس سے ٹکراتی رہے پیشانی
تیرے دکھ میں وہ ستوں ڈھونڈتے ہیں

وہ تو کھویا ہے کہیں باطن میں
ہم جسے اپنے بروں ڈھونڈتے ہیں

ہم کہ ترسی ہوئی شریانیں ہیں
اور اک قطرہ خوں ڈھونڈتے ہیں

اسی سے ہوتا ہے ظاہر جو حال درد کا ہے
سبھی کو کوئی نہ کوئی وبال درد کا ہے

حسن و جمال کے بھی زمانے نہیں رہے
آنکھوں میں اس کی خواب سہانے نہیں رہے

ملنے کو آ ہی جاتا ہے ہر چند روز بعد
لگتا ہے اس کے پاس بہانے نہیں رہے

لرزش ہے ہاتھ میں تو نظر بھی ہے دُھندلی
پہلے سے اب وہ دل کے نشانے نہیں رہے

اُٹھتی نہیں ہیں شوق و تجسّس کے باوجود
آنکھوں کے کتنے کام پرانے نہیں رہے

کمرے سب بھر گئے ہیں مسائل کی گرد سے
دل میں تیرے خیال کے خانے نہیں رہے

ِ جسم تپتے پتھروں پر روح صحراؤں میں تھی
پھر بھی تیری یاد ایسی تھی کہ جو چھاؤں میں تھی

ایک پر ہیبت سکوت مستقل آنکھوں میں تھا
ایک طغیانی مسلسل دل کے دریاؤں میں تھی

ہم ہی ہو گزرے ہیں خود اپنے شہر اجنبی
وہ جہاں بھی تھی وہاں اپنے شناساؤں میں تھی

اک صدا سی برف بن کر گر رہی تھی جسم پر
ایک زنجیر ہوا تھی جو میرے پاؤں میں تھی

دن مصیبت کے ٹل گئے ہوتے
اپنا رستہ بدل گئے ہوتے

دل کی وحشت نے بڑھ کے گھیر لیا
ورنہ آگے نکل گئے ہوتے

تیرے غم نے قدم اکھیڑ دیے
ورنہ کب کے سنبھل گئے ہوتے

تم نے لوگوں کو کیوں توجہ دی
اپنے ہی آپ جل گئے ہوتے

شکر ہے ہم نہیں ہیں دن ورنہ
شام کے وقت ڈھل گئے ہوتے

درد کی سلطنت کا راج ملا
بے قراری کا تخت و تاج ملا

وقت اک شعبدہ سا ہے اور بس
کل ملا ہے کبھی نہ آج ملا

آنکھ نا ہی کھلے تو بہتر ہے
آنکھ کھولی تو یہ رواج ملا

عشق سے بیاہ ہو گیا اور پھر
دل کی دلہن کو غم کا داج ملا

لگ کے کندھے سے روتا جاتا تھا
آج تک جو بھی ہم مزاج ملا

دن کو ہم سے ملا ہے صبر جمیل
رات کو درد کا خراج ملا

تیری یادیں ہی چھانتے ہیں ہم
دیکھو کیسا یہ کام کاج ملا

جاتے جاتے اس طرح سب کچھ سوالی کر گیا
روح کا کمرہ بھرا رہتا تھا خالی کر گیا

اب نہ کوئی راہ چیختی ہے نہ کوئی ہمسفر
ایک دو دن کے سفر کو یوں مثالی کر گیا

وقت بھی کیسی عجب شے ہے ہمارے سامنے
اک ذرا بیتا تو سب دنیا خیالی کر گیا

عشق اپنے ساتھ یہ کیسی نرالی کر گیا
چند لمحوں میں طبیعت لا ابالی کر گیا

ہجر کا اسپ پریشاں دل کی ہر اک آرزو
فصل لا وارث سمجھ کر پائمالی کر گیا

پربت پربت اڑے پھرے ہے من پنچھی بے چین
جانے کہاں کہاں لے جائیں سانوریا کے نین

آؤں کہیں چھپ کے روتے ہیں ورنہ نگری میں
کوئی سنے نا ہوک دلوں کی کوئی سنے نا بین

لو دھیرے دھیرے دھندلا ہوتا جاتا ہے مہتاب
بیت چلا ہے جیون، جیسے بیت چلی ہو رین

ہم تو جیسے دل آنکھوں میں لے کے پھرتے ہوں
بیٹھے بیٹھے ہنسی میں رو دیتے ہیں نین

بولو فرحت آخر کس کو دیکھ کے آئے ہو
مدت بعد تیری آنکھوں میں دیکھا ہے سکھ چین

زخم دل کی یہ کہانی کیا کروں
میں تیری اک اک نشانی کیا کروں