اردو اشعار Urdu Ashaar

سب سرحدوں سے شوق کی ہم پار ہو گئے
تُجھ سے ملے تو ابرِ گہر بار ہو گئے

ہر جنبشِ بدن کے تقاضے تھے مختلف
جذبے تمام مائلِ اظہار ہو گئے

زندہ رہے جو تُجھ سے بچھڑ کر بھی مُدّتوں
ہم لوگ کس قدر تھے جگر دار ہو گئے

اپنے بدن کے لمس کی تبلیغ دیکھنا
ہم سحرِ آذری کے پرستار ہو گئے

دو وقت، دو بدن تھے، کہ جانیں تھیں دو بہم
رستے تمام مطلعِ انوار ہو گئے

ماجد ہے کس کا فیضِ قرابت کہ اِن دنوں
پودے سبھی سخن کے ثمر دار ہو گئے

سورج سا نگاہ میں مچلنا
آغوش سے چاند بن کے ڈھلنا

انمول ہیں سب گِلے یہ تیرے
یہ لعل لبوں سے پھر اُگلنا

چھپنا پسِ ابر چاند جیسا
لہروں سا سرِ نظر اُچھلنا

ہیں شاخِ نظر کے یہ تقاضے
یہ برگ نہ ہاتھ سے مسلنا

مشکل ہے بغیرِ قرب تیرے
اِس رُوح و بدن کا اب سنبھلنا

یہ اذنِ طرب ترے لبوں پر
خوشبو کا کلی سے ہے نکلنا

موزوں ہے سخن تجھے یہ ماجدؔ
پہلو کوئی اور مت بدلنا

سر سے تا پا حجاب سا وُہ
کمیاب ہے لعلِ ناب سا وُہ

اُبھرے بھی جو سطحِ آرزُو پر
روکے نہ رُکے حباب سا وُہ

خوشبُو سا خیال میں دَر آئے
آنکھوں میںبسے گلاب سا وُہ

سب تلخ حقیقتوں پہ حاوی
رہتا ہے نظر میں خواب سا وُہ

حاصل ہے سرشکِ لالہ رُو کا
محجوب سا، دُرِّ آب سا وُہ

چھایا ہے بہ لُطف ہر ادا سے
خواہش پہ مری نقاب سا وہ

ہُوں جیسے، اُسی کے دم سے قائم
تھامے ہے مجھے طناب سا وُہ

بارانِ کرم مرے لئے ہے
غیروں کے لئے عتاب سا وُہ

ماجدؔ ہو یہ جُستجو مُبارک
ہاتھ آ ہی گیا سراب سا وُہ

کس اَن ہونی کے ہونے سے یُوں مطلعِ صدا انوار ہوئے
دیکھو تو بدن ہم دونوں کے کیسے باہم دوچار ہوئے

کمیاب تھی ساعتِ قرب تری کیا کُچھ نہ ہُوا جب دَر آئی
ہم چاند بنے ہم مہر ہوئے ہم نُور بنے ہم نار ہوئے

سادہ سا وُہ حرفِ اذن ترا اور مہلت پھر یکجائی کی
فرصت تو فقط اِک شب کی تھی پر دور بڑے آزار ہوئے

با وصفِ کرم، جو الجھن تھی وُہ اور کسی ڈھب جا نہ سکی
آخر کچھ وحشی جذبے ہی ہم دونوں کے غمخوار ہوئے

کیا چیت کی رُت اور کیا ساون جب سے دیکھا ہے اساڑھ ترا
سُونا ہے نگاہوں کا آنگن سب موسم اِس پر بار ہوئے

مُدّت سے ترستے تھے دِل میں جو لذّتِ یکدم کو ماجدؔ
تسکین ملے پر وُہ جذبے آخر کیوں پُر اسرار ہوئے

کس مہر کا ہے عکس کہ تیرے بدن میں ہے
جو حرفِ لطف ہے وہی کنجِ دہن میں ہے

دیکھے سے جس کے سِحر زدہ ہو ہر اک نگاہ
سربستگی سی کیا یہ ترے پیرہن میں ہے

رنگینیاں تجھی میں چمن کے جمال کی
اور سادگی وہی کہ جو کوہ و دمن میں ہے

ہر اوجِ آرزُو ہے نثار اِس نشیب پر
رفعت نہ جانے کیا ترے چاہِ زقن میں ہے

خنکی تو خیر جسم کی رشکِ چمن سہی
حدّت بھی اس طرح کہ کہاں دشت و بن میں ہے

حسرت سے دیکھتی ہیں سوالی رُتیں تجھے
کیا تازگی یہ تیری نظر کے ختن میں ہے

اُمڈے ہے حرف حرف میں کس شہ پہ اِن دنوں
ماجدؔ یہ لطفِ خاص جو تیرے سخن میں ہے

کھُل کے اظہارِ مدّعا کرتے
یوں بھی ہم تُم کبھی مِلا کرتے

مانگتے گر کبھی خُدا سے تمہیں
لُطف آتا ہمیں دُعا کرتے

سج کے اک دُوسرے کے ہونٹوں پر
ہم بھی غنچہ صفت کھِلا کرتے

ہم پئے لُطف چھیڑ کر تُجھ کو
جو نہ سُننا تھا وُہ سُنا کرتے

جگنوؤں سا بہ سطحِ یاد کبھی
ٹمٹماتے، جلا بُجھا کرتے