Huge Collection Of Ashars

سُن تو سہی جہاں میں ہے تیرا فسانہ کیا
کہتی ہے تجھ کو خلقِ خدا غائبانہ کیا

یار کو میں نے مجھے یار نے سونے نہ دیا
رات بھر طالعِ بیدار نے سونے نہ دیا

یہ آرزو تھی تجھے گُل کے رُو برُو کرتے
ہم اور بلبلِ بے تاب گفتگو کرتے

محبت سے بنا لیتے ہیں اپنا دوست دشمن کو
جھکاتی ہے ہماری عاجزی سرکش کی گردن کو

خوشا وہ دل کہ ہو جس دل میں* آرزو تیری
خوشا دماغ جسے تازہ رکھّے بُو تیری

کوئی عشق میں مُجھ سے افزوں نہ نکلا
کبھی سامنے ہو کے مجنوں نہ نکلا

دہن پر ہیں ان کے گماں کیسے کیسے
کلام آتے ہیں درمیاں کیسے کیسے

چمن میں شب کو جو وہ شوخ بے نقاب آیا
یقیں ہو گیا شبنم کو، آفتاب آیا

بیمار عشق و رنج و محن سے نکل گیا
بیچارہ منہ چھپا کے کفن سے نکل گیا

ہوتا ہے سوز عشق سے جل جل کر دل تمام
کرتی ہے روح مرحلہ آب و گل تمام