اردو اشعار Urdu Ashaar

کسی کی موت کے آثار دل میں
صف ماتم بچھانے آ گئے ہیں

بتا دو موسم گریہ کو فرحت
کہ ہم رونے رلانے آ گئے ہیں

کہاں دل قید سے چھوٹا ہوا ہے
ابھی تک شہر سے روٹھا ہوا ہے

ہمیں کیسے کہیں اس دل کو سچا
ہمارے سامنے جھوٹا ہوا ہے

کسی کا کچھ نہیں اپنا یہاں پر
یہ سب سامان ہی لوٹا ہوا ہے

تمہارے دل میں میری چاہتوں کا
کوئی تو بیج سا پھوٹا ہوا ہے

کسی کے نام لگ جائے بلا سے
یہ دل پہلے سے ہی ٹوٹا ہوا ہے

ہم تجھے شہر میں یوں ڈھونڈتے ہیں
جس طرح لوگ سکوں ڈھونڈتے ہیں

ہم گو منصور نہیں ہیں لیکن
اس کا انداز جنوں ڈھونڈتے ہیں

جس سے ٹکراتی رہے پیشانی
تیرے دکھ میں وہ ستوں ڈھونڈتے ہیں