na ganvao navak-e-nim-kash

na ganvao navak-e-nim-kash, dil-e-reza reza ganva diya
jo bache hain sang samet lo, tan-e-dag dag luta diya

mere charagar ko naved ho, saf-e-dushmanan ko khabar karo
wo jo qarz rakhte the jan par, wo hisab aj chuka diya

karo kaj jabin pe sar-e-kafan, mere qatilon ko guman na ho
ki gurur-e-ishq ka bankpan, pas-e-marg hamne bhula diya

udhar ek harf ki kushtani, yahan lakh uzr tha guftani
jo kaha to sun k ura diya, jo likha to parh k mita diya

jo ruke to koh-e-garan the ham, jo chale to jan se guzar gaye
rah-e-yar hamne qadam qadam, tujhe yadagar bana diya