سلمان بٹ کا بنگلہ دیش کے کلب سے معاہدہ

پاکستان کرکٹ ٹیم کے سابق کپتان سلمان بٹ نے پاکستان کرکٹ بورڈ (پی سی بی) کی جانب سے این او سی جاری کیے جانے کے بعد بنگلہ دیش کے ڈھاکا پریمیئر لیگ کے محمڈن اسپورٹنگ کلب سے معاہدہ کرلیا۔
خیال رہے کہ 33 سالہ سلمان بٹ ان چند پاکستانی کھلاڑیوں میں شامل تھے جنہوں نے اجمان آل اسٹارز میں شمولیت اختیار کی یا ارادہ کیا تھا۔
یاد رہے کہ اجمان آل اسٹارز ٹی 20 ٹورنامنٹ کے حوالے سے انٹرنیشنل کرکٹ کونسل (آئی سی سی) نے کرپشن کے شواہد حاصل کرنے کا دعویٰ کیا تھا۔
سلمان بٹ نے ڈان نیوز سے گفتگو کرتے ہوئے کہا کہ انھوں نے متحدہ عرب امارات (یو اے ای) کا دورہ کیا تھا جس کے بعد انہوں نے اس ٹورنامنٹ میں شامل نہ ہونے کا فیصلہ کیا تھا۔
کرکٹ ماہرین نے ان کے اس نظریہ سے اختلاف کرتے ہوئے بتایا ہے کہ سلمان بٹ نے متنازع ٹی 20 لیگ میں ایک میچ بھی کھیلا تھا۔
تاہم پی سی بی کی جانب سے سلمان بٹ کو کسی غلط کام میں ملوث نہ ہونے کا کہتے ہوئے انہیں این او سی جاری کیا گیا تھا جس کے بعد انہوں نے بنگلہ دیش کے اے کلاس ٹورنامنٹ محمڈن میں شمولیت اختیار کی۔
سلمان بٹ نے کرکٹ ویب سائٹ ای ایس پی این کرک انفو کو انٹرویو دیتے ہوئے کہا تھا کہ طویل عرصے کے بعد میرا یہاں ہونا مجھے بہت اچھا لگ رہا ہے۔
ان کا کہنا تھا کہ گزشتہ کچھ عرصے میں بنگلہ دیش اعلیٰ معیار کی کرکٹ کھیلنے کی جگہ بن گئی ہے اور انھوں نے کھیل میں اپنی صلاحیتوں کو بارہا منوایا ہے اور یہ سب ان کے ڈومیسٹک کھیل سے سامنے آتا ہے۔
انھوں نے کہا کہ محمڈن اسپورٹنگ کلب تاریخی حیثیت رکھتا ہے، کئی عظیم پاکستانی کھلاڑیوں نے اس کلب کی نمائندگی کی اور مجھے امید ہے کہ میں بھی یہاں اچھی کارکردگی دکھاؤں گا۔
انھوں نے مزید کہا کہ شکیب الحسن ٹیم کے کپتان ہوں گے اور مجھے امید ہے کہ ان کے ہونے سے اس سیزن میں کچھ نیا ہوگا۔
واضح رہے کہ سلمان بٹ کو قومی ون ڈے کپ کے لیے لاہور کا کپتان مقرر کیا گیا تھا تاہم لاہور سٹی کرکٹ ایسوسی ایشن نے سلیکشن میں اختلافات کی وجہ سے انھوں نے ٹورنامنٹ میں شرکت نہیں کی۔

عمدہ اور خوب صورت انتخاب
شیئر کرنے کا شکریہ