ہو گئی بیف مٹن مُرغے سے خالی دُنیا

ہو گئی بیف مٹن مُرغے سے خالی دُنیا
اور دالوں نے بھی تاروں میں بسا لی دُنیا
زردہ ، بریانی تو اک قصہ ءِ پارینہ ہے
اب تو کھاتی ہے پلاؤ بھی خیالی دنیا

میرے مولا ! کوئی تدبیر نیاری کر دے
پھر من و سلویٰ کا راشن ہمیں جاری کر دے

سبزیاں ہیں تو ، مگر کوئی خریدار نہیں
نرخ ہیں شعلہ فشاں ، گرمی ِءِ بازار نہیں
نہ ہری مرچ ، نہ دھنیا نہ ٹماٹر اس میں
اس پہ شکوہ ہے کہ سالن یہ مزیدار نہیں

اے خُدا ! نُسخہ کوئی ایسا بتائے ہم کو
نل کے پانی میں مزا " سُوپ " کا آئے ہم کو

افسری کی تو بڑے رنگ جمائے ہم نے
فائل اک اک سے بہت مال کمائے ہم نے
جتنے بے کار نکمے تھے بھتیجے بھانجے
چُن کے زرخیز محکموں میں کھپائے ہم نے

پھر بھی نہ شُکر کریں تیرا ، گنہگار ہیں ہم
میرے مولا ! تیری رحمت کے طلب گار ہیں ہم

ماہِ رمضان بڑی برکتیں لایا مولا
نرخ ہر چیز کا مرضی سے بڑھایا مولا
مال برسات میں گودام میں جو بھیگا تھا
دو گُنے ریٹ پہ وہ سب بھی چلایا مولا

عیدِ قربان کا سیزن بھی اگر یوں ہی لگا
انجمِ عاصی تیرے در پہ ضرور آئے گا

محمد اجمل انجم