ندا فاضلی ....شہر میں بسا گاؤں

http://dunya.com.pk/news/special_fea...9_gEJFPNSc.jpg

ڈاکٹر سلیم محی الدین
وقت کے ساتھ ہے مٹی کا سفر صدیوں سے کس کو معلوم کہاں کے ہیں کدھر کے ہم ہیں صدیوں کے سفر کا کچھ حصہ کچھ دیواروں کے درمیان اور کچھ دیواروں کے باہر گزار کر ندا اپنے اصلی سفر پر روانہ ہو گئے۔ دنیا کو جادو کا کھلونا قرار دینے والے ندا نے اس کھلونے سے خوب حظ اٹھایا۔ دنیا ندا کے لئے کچھ آسان نہ تھی۔ گوالیار سے بھوپال اور بھوپال سے ممبئی کا سفر، معاشی مسائل، خاندان کا ہجرت کر جانا، ناپسندیدہ سیاسی و سماجی حالات، ایک سوچنے والے ذہن کے لئے مسائل بے شمار تھے۔ ندا کی ذات اپنے آپ میں ایک بھرا پرا گاؤں تھی۔ ایک ایسا گاؤں ،جہاں زندگی اپنی تمام تر رعنائیوں اور جلوہ سامانیوں کے ساتھ رواں دواں تھی۔ صبح دم چڑیوں کی چہچہاہٹ، مرغی کی آواز پر دروازے کی چٹخنی کھولتی ماں، مندر کی گھنٹیاں، مؤذن کی اذاں، کنویں سے پانی بھرتی جوانیاں، پیپل کا پیڑ اس پر تھرکتی گلہریاں، آنگن کا وہی پیڑ جو دن میں دوست ہوتا پر رات وہی ایک بھوت کا بسیرا لگتا، سرگوشیاں کرتی ہوا، لہلہاتی کھیتیاں، امرائیاں، اپنے ہی گھر کی وسعت کا احساس دلاتی گلیاں، غرض بے شمار مناظر تھے اور یہ سارے مناظر اسی گاؤں کے ہیں، جو ندا کے اندر بستا تھا۔ وہ اسی گاؤں کو اپنے اندر بسائے شہر میں آ بسے۔ شہر میں گاؤں،لیکن ندا تو صرف آنکھوں سے دنیا دیکھنے کے قائل نہیں تھے۔ وہ تو دل کی دھڑکن کو بینائی بنا کر دیکھنے میں یقین رکھتے تھے: صرف آنکھوں سے ہی دنیا نہیں دیکھی جاتی دل کی دھڑکن کو بھی بینائی بنا کر دیکھ ندا نے اپنی آنکھ اور دل کی دھڑکن دونوں سے بیک وقت بینائی کا کام لیا، اسی لئے تو ان کی ہر تصویر مکمل لگتی ہے، بقول ندا ’’ لفظوں کا پل میں شامل غزلیں، نظمیں، گیت اور قطعات اس معاشرے کی دین ہیں، جو فاصلوں اور دوریوں میں ایک دوسرے سے لاتعلق نہیں ہوا تھا۔ ایک گھر کا دکھ پورے محلے کا غم ہوتا تھا۔ ایک حادثے میں پورا شہر روتا تھا۔ اس ماتم میں انسانوں کے ساتھ درخت، تالاب، راستوں میں گھومتے پھرتے جانور، اڑتے ہوئے پرندے، مکانوں کے چھجے سب شریک ہوتے تھے۔ ندا نے اپنی شاعری میں دورازکار تشبیہات، علائم اور استعارات کا استعمال کم کم ہی کیا ہے۔ انہوں نے سارے تلازمے، لفظیات اور اسلوب اپنے اطراف کے ماحول ہی سے اٹھایا ہے۔ چاہے نثر ہو چاہے نظم، ندا نے سارے کردار بھی اپنے اطراف ہی سے اٹھائے ہیں۔ یہ الگ بات کہ ان کرداروں میں سب سے اہم کردار وہ خود ہوا کرتے تھے۔ وہ اپنے آپ کو ہر کہانی کے مرکز میں رکھنے اور اپنی ذات کی تشبیہ کے ہنر سے خوب واقف تھے۔ اپنی کسی نظریاتی وابستگی کا کبھی کھل کر اظہار کیا، نہ کسی نظریے کی کھل کر مخالفت۔ لیکن لوگوں کو اپنی طرف متوجہ کرنے کیلئے سورج کو مرغے کی چونچ میں دے کر کھڑا ضرور کر دیا: سورج کو چونچ میں لئے مرغا کھڑا رہا کھڑکی کے پردے کھینچ دئیے رات ہو گئی سوانحی ناول ’’ دیواروں کے بیچ ‘‘ میں اپنے والدین کی ازدواجی زندگی کا نقشہ ہو کہ خود اپنی بے راہ رویوں کا تذکرہ، خاکوں کے مجموعوں میں اپنے بزرگوں سے لے کر دوستوں تک کا خاکہ اڑایا بھی ہے اور اس میں رنگ بھی بھرے۔ ایک سیاسی رہنما کے نام نظم اسی کی موجودگی میں سنا کر انجام کی پرواہ نہ کرنے والے کو بھی دنیا ندا فاضلی ہی کے نام سے جانتی ہے۔ نظم اور نثر دونوں پر قدرت اور دونوں ہی میں اپنا اسلوب پا لینا ندا ہی کا کمال ہے۔ بقول وارث علوی ،ندا کسی اسلوب کا اسیر نہیں اور وہ ایک نئی زمین میں اپنی جڑیں تلاش کرنے کے عمل میں کامیاب ہے۔ جبکہ بشر نواز کے مطابق گھر، خدا اور شہر ندا فاضلی کی شہری رامائن کے تین اہم کردار ہیں۔ یہ حقیقت ہے کہ گھرو ندا کی شاعری کا ایک اہم استعارہ ہے۔ جب بھی کوئی رشتہ ٹوٹتا ہے، جب بھی کوئی سہارا چھوٹتا ہے اور جب بھی کوئی فکری خلا نمودار ہوتا ہے، ندا اپنے آپ کو خدا سے مزید قریب پاتا ہے جبکہ شہر ندا کے لئے اس معاشرے، اس سماج اور اس ماحول کا استعارہ ہے، جس سے ہزار عدم اتفاق کے باوجود وہ متفق ہے۔ انسان اور انسانی زندگی کی بے شمار خرابیوں، ناچاقیوں اور عدم رواداریوں کے باوجود انسان اور زندگی کے تئیں اس کا رویہ ہمیشہ مثبت رہا اور وہ یہی کہتا رہا کہ مجھے پھول جیسے چہرے اور چہرے جیسے پھول اچھے لگتے ہیں۔ بقول ندا ’’چند لمحوں کو ہی بنتی ہیں مصور آنکھیں‘‘۔ ندا کی زندگی میں ایسے بے شمار لمحے آئے اور اس نے بے شمار تصویریں اپنی تحریروں کی شکل میں ہمارے لئے چھوڑی ہیں: چند لمحوں کی ہی بنتی ہیں مصور آنکھیں زندگی روز نئی تصویر بنانے سے رہی ٭…٭…٭