خلق نے تو اس کو ایسے میں بھی ذی شاں کہہ دیا

خلق نے تو اس کو ایسے میں بھی ذی شاں کہہ دیا

پر شہِ بے پیرہن کو میں نے عریاں کہہ دیا

رزق نے جس کے مجھے پالا ہے جس کا رزق ہوں

کہہ دیا اس خاک کو میں نے رگِ جاں کہہ دیا

اِس تمنّا پر کہ ہاتھ آ جائے نخلستاں کوئی

خود غرض نے دیکھ صحرا کو گلستاں کہہ دیا

ہمزبانِ شاہ وہ بھی تھے جنہوں نے آز میں

رات تک کو، یار کی زلفِ پریشاں کہہ دیا

میں وہ خوش خُو جس نے دو ٹانگوں پہ چلتا دیکھ کر

شہر کے بن مانسوں تک کو بھی انساں کہہ دیا

کیا کہوں کیوں میں نے سادہ لوح چڑیوں کی طرح

وقفۂ شب کو بھی تھا صبحِ درخشاں کہہ دیا

اس کے ناطے، درگزر جو محض عُجلت میں ہوئی

گرگ کو بھی بھیڑ نے ماجدؔ پشیماں کہہ دیا

٭٭٭