کیوں جل گیا نہ، تابِ رخِ یار دیکھ کر

کیوں جل گیا نہ، تابِ رخِ یار دیکھ کر
جلتا ہوں اپنی طاقتِ دیدار دیکھ کر
آتش پرست کہتے ہیں اہلَ جہاں مجھے
سرگرمِ نالہ ہاۓ شرربار دیکھ کر
کیا آبروۓ عشق، جہاں عام ہو جفا
رکتا ہوں تم کو بے سبب آزار دیکھ کر
آتا ہے میرے قتل کو پَر جوشِ رشک سے
مرتا ہوں اس کے ہاتھ میں تلوار دیکھ کر
ثابت ہوا ہے گردنِ مینا پہ خونِ خلق
لرزے ہے موجِ مے تری رفتار دیکھ کر
وا حسرتا کہ یار نے کھینچا ستم سے ہاتھ
ہم کو حریصِ لذّتِ آزار دیکھ کر
بِک جاتے ہیں ہم آپ، متاعِ سخن کے ساتھ
لیکن عیارِ طبعِ خریدار دیکھ کر
زُنّار باندھ، سبحۂ صد دانہ توڑ ڈال
رہرو چلے ہے راہ کو ہموار دیکھ کر
ان آبلوں سے پاؤں کے گھبرا گیا تھا میں
جی خوش ہوا ہے راہ کو پُر خار دیکھ کر
کیا بد گماں ہے مجھ سے، کہ آئینے میں مرے
طوطی کا عکس سمجھے ہے زنگار دیکھ کر
گرنی تھی ہم پہ برقِ تجلّی، نہ طو ر پر
دیتے ہیں بادہ’ ظرفِ قدح خوار’ دیکھ کر
سر پھوڑنا وہ! ‘غالبؔ شوریدہ حال’ کا
یاد آگیا مجھے تری دیوار دیکھ کر

Kion jal gaya na, tabe rukhe yar daikh ker
Jalta hon apnni taqate dedar daikh ker
Atash parast kahte hai ahle jahan mujhe
Ser germ nalah haai sharer bar daikh ker
Kaya aabroai ishq, jhan aam ho jafa
Rukta hon, tum ko be sabab azar daikh ker
Ata hai mere qatl ko pur josh rashk se
Merta hon us ke hath mein talwar daikh ker
Sabit hua hai gerdane meena pe. Khoone khalq
Lerze hai mauje mai teri raftar daikh ker
Wahasrata! Ki yar ne kheencha sitam se hath
Hum ko harrese lazzate azar daikh ker
Bik jate hain hum aap mataye sukhan ke sath
Laikin ayare tabe kharidar daikh ker
Zunnar bandh, subhai sad danah tod dal
Rahrao chaley hai rah ko hum war daikh ker
In ablon se paon ke ghbra gaya tha main
Ji khush hua hai rah ko pur khaa daikh ker
Kaya bad guman hai mujh se ki aiene mere
Tooti ka aks samjhe hain zangar daikh ker
Girni thi hum pe berqe tajalli na toor per
Daite hain badah zerf qdah khuwar daikh ker
Ser fodna woh Ghalib shoridah hal ka
Yaad aa gaya mjhe, teri dewar daikh ker