تو دوست کسی کا بھی، ستمگر! نہ ہوا تھا

تو دوست کسی کا بھی، ستمگر! نہ ہوا تھا
اوروں پہ ہے وہ ظلم کہ مجھ پر نہ ہوا تھا
چھوڑا مہِ نخشب کی طرح دستِ قضا نے
خورشید ہنوز اس کے برابر نہ ہوا تھا
توفیق بہ اندازۂ ہمت ہے ازل سے
آنکھوں میں ہے وہ قطرہ کہ گوہر نہ ہوا تھا
جب تک کہ نہ دیکھا تھا قدِ یار کا عالم
میں معتقدِ فتنۂ محشر نہ ہوا تھا
میں سادہ دل، آزردگیِ یار سے خوش ہوں
یعنی سبقِ شوقِ مکرّر نہ ہوا تھا
دریائے معاصی ُتنک آبی سے ہوا خشک
میرا سرِ دامن بھی ابھی تر نہ ہوا تھا
جاری تھی اسدؔ! داغِ جگر سے مری تحصیل
آ تشکدہ جاگیرِ سَمَندر نہ ہوا تھا


To dost kisi ka bhi sitam gar na hua tha
Auron pe hai woh zulm ki mujh per na hua tha
Choda mahe nakhshab ki trah daste qaza ne
Khurseed hunooz uske braber na hua tha
Taufeeq bandazai himmat hai jhan azal se
Ankhon mein hai woh qatrah ki gauher na hua tha
Jab tak ki nah daikha tha qade yar ka alam
Main motaqide fitnai mahsher na hua tha
Mein sadah dil azurdagiye yar se khush hon
Yani sabqe shauq mukarraa na hua tah
Deryai muasi tutunuke aabi se hua khushk
Meira sare daman bhi abhi tter na hua tha
Jari thi, Asad! dage jigger se meri tahseel
Atashkadah, jageere samnder na hua tha