ڈاکٹر وزیر آغا

http://dunya.com.pk/news/special_fea...ujsC3TqHsB.jpg

رشید امجد
وزیر آغا ان لوگوں میں سے ہیں جن کو میں اپنا ادبی استاد سمجھتا ہوں۔ پچھلے چند برسوں سے وزیر آغا ،لاہور میں قیام پذیر ہو گئے تھے۔ اس دوران مہینے میں ایک آدھ بار سر گودھے کا چکر لگا آتے، لیکن کچھ عرصہ سے یہ جانا بھی موقوف ہو گیا تھا۔ لاہور انہیں مزاجاً پسند نہیں تھا۔ ان کا کہنا تھا کہ لاہور میں رہ کر مجلسی مصروفیات زیادہ ہو جاتی ہیں اور لکھنے پڑھنے کا کام کم ہوتا ہے، لیکن آخر آخر وہ اپنے کمرے تک محدود ہو گئے جسے وہ اپنا برگد کہتے تھے۔ وزیر آغا سے میری پہلی پہلی ملاقاتیں ساٹھ کی دہائی میں ہوئیں۔ ابھی ’’اوراق‘‘ نہیں نکلا تھا۔ ان کا معمول تھا کہ گرمیوں کی چھٹیوں میں ایک ماہ کے لئے مری آتے تھے۔ سرگودھا سے ٹرین علی الصبح راولپنڈی پہنچتی تھی۔ آغا صاحب فیملی کے ساتھ درجہ اوّل کے ویٹنگ روم میں ٹھہر جاتے اور وہاں سے سہ پہر کو مری جاتے۔ اس دوران میں اور دوسرے نوجوان لکھنے والے وہاں آجاتے اور ان سے مختلف ادبی موضوعات پر گفتگو ہوتی۔ اکثر ہم دوپہر کا کھانا وہیں، ان کے ساتھ کھاتے۔ ابھی قاسم آغا جھگڑا شروع نہیں ہوا تھا، اس لئے گفتگو خالصتاً ادبی و فکری موضوعات پر ہوتی۔ گفتگو کیا ہوتی ، آغا صاحب بولتے رہتے اور ہم سنتے رہتے۔ مولانا صلاح الدین کے اچانک انتقال پر ’’ادبی دنیا‘‘ وقتی طور پر بند ہو گیا۔ آغا صاحب اس کے شریک مدیر تھے۔ مولانا کے انتقال پر ان کے بیٹوں کے ساتھ اختلافات کی وجہ سے آغا صاحب ’’ادبی دنیا ‘‘ سے علیحدہ ہو گئے اور دل برداشتہ سرگودھا آ گئے۔ شہزاد احمد نے انہیں مشورہ دیا کہ وہ اپنا پرچہ نکالیں۔ ’’اوراق‘‘ کا نام بھی شہزاد احمد نے تجویز کیا۔ ’’اوراق‘‘ جنوری 66ء میں شائع ہوا۔ اس کے پہلے اداریے نے ادبی قومیت کا باقاعدہ تصور پیش کیا۔ اس سے پہلے آغا صاحب کے ایک مضمون ’’میرا جی … دھرتی پوجا کی ایک مثال ‘‘ نے لفظ دھرتی کے حوالے سے متنازع بحث کا آغاز کر دیا تھا، لیکن ستمبر65ء کی جنگ نے سرحدوں کے تقدس کا جو نیا احساس پیدا کیا اُس نے پاکستانی ادب میں پہلی بار زمین کی اہمیت کو اُجاگر کیا۔ پاکستانی ادب کا اوّلین نعرہ حسن عسکری اور ممتاز شیریں نے بلند کیا تھا ،لیکن یہ تصور بنیادی طور پر ترقی پسندوں کو رد رکرنے کے لئے تھا، دوسرے اس حوالے سے ایک بھی تخلیقی شے وجود میں نہیں آئی، چنانچہ کچھ ہی عرصہ بعد یہ صرف ایک تاریخی بحث کے طور پر اپنی موت آپ مر گیا۔ اس کے برعکس وزیر آغا کا ادبی قومیت کا تصور زمین اور اس کے مظاہر کے حوالے سے تھا اور پاکستانی ادب کی وہ نظریہ سازی تھی، جو آج اپنے مکمل وجود کے ساتھ ہمارے سامنے ہے۔ وزیر آغا نے ’’اوراق‘‘ کے ذریعے نہ صرف جدید یت کی فکری وفنی حد بندی کر کے اسے ایک سمت عطا کی بلکہ ساٹھ کی دہائی میں سامنے والی نئی نسل کی ذہنی، فکری و فنی تربیت بھی کی۔ ’’اوراق‘‘ کے اداریے اس ضمن میں خاصی اہمیت رکھتے ہیں۔ اس کے علاوہ ’’اوراق‘‘ کا ایک مستقل سلسلہ ’’سوال یہ ہے ‘‘ اور فلموں اور ا فسانوں کے تجزیاتی مطالعے اس پر چے کی انفرادیت کی دلیل تھے۔ آغا صاحب کہتے تھے کہ کسی پرچے کو پوسٹ آفس نہیں ہونا چائیے کہ جو وچھ ملا اسے آگے پہنچا دیا بلکہ اس میں اس کے مدیر کے فکری رجحانات و رویوں کا مکمل احساس ہونا چاہئے ، اس کی ایک سمت ہونا چائیے۔ ’’اوراق‘‘ میں دونوں پہلو موجود تھے۔ ساٹھ کی نئی لسانی تشکیلات سے متاثر جس نسل نے نئے افسانے اور نئی شاعری کا آغاز کیا تھا، اس میں ابتداً بڑی افراط و تفریط تھی۔ نئے لوگوں کو کوئی پرچہ چھاپنے کے لئے تیار نہیں تھا۔ ’’اوراق‘‘ نے نہ صرف اس نئی نسل کو ایک پلیٹ فارم مہیا کیا بلکہ ان کی تربیت بھی کی۔ وزیر آغا نقاد، شاعر اور جدید انشائیہ کے بانی تھے۔ تنقید میں ان کا ایک خاص مقام ہے۔ وہ ایک صاحب مطالعہ شخص تھے۔ ان کا مطالعہ صرف ادب تک محدود نہیں تھا۔ انہوں نے معاشیات میں ایم اے کیا تھا، لیکن ان کی دلچسپی کے دائروں میں سائنس خصوصاً فزکس شامل تھی۔ ان کی تحریروں میں اس وسیع مطالے کی جھلکیاں جابجا موجود ہیں۔ انہوں نے اُردو تنقید کو نئے لہجے اور نئے فکری رویوں سے آشنا کیا۔ وہ امتزاجی تنقید کے نئے دبستان کے بانی ہیں۔ مطالعے کا شوق آخردم تک ان میں موجود رہا۔ میں آخری بار جب بائیس جولائی کو ان سے ملا تو ان کا بیڈ کتابوں سے بھرا ہوا تھا، صرف سونے کے لئے تھوڑی سی جگہ خالی تھی۔ وہ نہ صرف باہر سے کتابیں منگواتے بلکہ ملنے والے ہر برچے اور کتاب کو پڑھتے۔ ا ن کی خوبی تھی کہ اپنے مطالعے میں دوستوں کو بھی شریک کرتے۔ ان کے خلاف جب منظم ادبی محاذ بنایا گیا تو کوئی نہ کوئی انہیں خوش کرنے کے لئے مخالفوں کا ذکر کرتا، وہ عموماً خاموش رہتے اور دوسرے اس موضوع پر بات کرتے رہتے۔ ٭…٭…٭