mil he jaayega khabi, dil ko yaqeeN rahta hai
vo isi sheher ki galiyoN meN kaheeN rahta hai
jis ki saansoN se mahakte the dar-o-baam tere
ai makaan bol, kahaaN ab vo makeeN rahta hai
ek zamaana tha ki sab ek jagah rahty the
aur ab koii kaheeN, koii kaheeN rahta hai
roz milne pe bhi lagta tha ki jag beet gaye,
ishq meN waqt ka ehsaas naheeN rahta hai
dil fasurda to huaa dekh ke us ko lekin
umr bhar kaun jawaan, kaun haseen rahta hai
"Ahmad" Mushtaq
