روزے کی عمومی طبّی برکات!

http://dunya.com.pk/news/special_fea...DbJQ4hhaJe.jpg

ڈاکٹر ہلوک نور باقی(ترکی) مترجم: محمد فیزوز شاہ گیلانی
کچھ عرصہ قبل تک یہی سمجھا جاتا تھا کہ روزہ کا اصل فائدہ یہ ہے کہ نظام ہضم کو کچھ آرام مِل جائے، مگر اب طبی سائنس کی جدید تحقیق آشکار کر چکی کہ یہ تو ایک طبی معجزہ ہے… روزے کی بابت اس امر کا بھی اعلان کیا گیا کہ ہم اس سے حاصل کردہ رحمتیںپا سکتے ہیں بشرطیکہ ہم سچ کو پہچان سکیں۔آئیے سائنسی تناظر میں دیکھتے ہیں کہ کس طرح روزہ ہمیں صحت مند رہنے میں مدد دیتا ہے: نظامِ انہضام پہ اثر انسان کا نظام انہضام ایک دوسرے سے ملے کئی اعضا پر مشتمل ہے۔ اہم جسمانی اعضا جیسے منہ اور جبڑے میں لعابی غدود، زبان، گلا، مقوی نالی ( Canal Alimentary) یعنی گلے سے معدے تک خوراک لے جانے والی نالی) معدہ، بارہ انگشت آنت، جگر اور لبلبہ اور آنتوں کے مختلف حصے وغیرہ تمام اسی نظام کا حصہ ہیں۔ یہ سب پیچیدہ اعضا خودبخود ایک کمپیوٹری نظام کے تحت عمل کرتے ہیں۔ جیسے ہی ہم کچھ کھانا شروع کریں یا کھانے کا ارادہ ہی کر لیں، یہ پورا نظام حرکت میں آ جاتا ہے، تب ہر عضو اپنا مخصوص کام کرنے لگتا ہے۔ ظاہر ہے، یہ سارا نظام چوبیس گھنٹے ڈیوٹی پر رہنے کے علاوہ اعصابی دبائو اور غلط قسم کی خوراک کھانے کے باعث رفتہ رفتہ کمزور ہو جاتا ہے۔روزے ایک طرح اس سارے نظام کو ایک ماہ کا آرام دیتے ہیں۔ یہ آرام ملنے کا حیران کن اثر بطور خاص جگر پر ہوتا ہے کیونکہ جگر کھانا ہضم کرنے کے علاوہ پندرہ مزید اعمال بھی انجام دیتا ہے۔ سو وہ مسلسل کام کرنے کی وجہ سے اسی طرح تھکان کا شکار ہو جاتا ہے، جیسے ایک چوکیدار ساری عمر کے لیے پہرے پر کھڑا ہو۔ جگر خراب ہو جائے، تو وہ صفرا (Bile) کی رطوبت جس کا اخراج ہاضمہ کے لیے ہوتا ہے، زیادہ پیدا کرتا ہے۔ یہ امر مختلف قسم کے مسائل پیدا کرتا اور دوسرے جسمانی اعمال پر بھی اثر انداز ہوتا ہے۔ روزوں کے ذریعے جگر کو چار سے چھ گھنٹوں تک آرام مل جاتا ہے۔روزے کے بغیر یہ وقفہ ملنا قطعی ناممکن ہے کیونکہ بے حد معمولی خوراک یہاں تک کہ ایک گرام کے دسویں حصہ کے برابر بھی اگر معدے میں داخل ہو جائے، تو پورے نظام ہضم کا کمپیوٹر اپنا کام شروع کر دیتا ہے۔ جگر بھی فوراً مصروف عمل ہوتا ہے۔ گویا سائنسی نقطہ نظر سے یہ دعویٰ کیا جا سکتا ہے کہ اس آرام کا وقفہ سال میں ایک ماہ لازمی آنا چاہیے۔جدید دور کا انسان متعدد طبی معائنوں (ٹیسٹوں) کے ذریعے اپنے آپ کو محفوظ بنانے کی سعی کرتا ہے، لیکن اگر جگر کے خلیے کو قوت گویائی حاصل ہوتی تو وہ ایسے انسان سے کہتا ’’تم مجھ پر ایک عظیم احسان صرف روزے کے ذریعے ہی کر سکتے ہو‘‘۔جگر پر روزوں کی برکات میں سے ایک خون کے کیمیائی عمل پر اس کی اثر اندازی بھی ہے۔ جگر کے انتہائی مشکل کاموں میں ایک کام اس توازن کو برقرار رکھنا بھی ہے جو غیر ہضم شدہ اور تحلیل شدہ خوراک کے درمیان ہوتا ہے۔ اسے یا تو ہر لقمے کی غذائیت کو ذخیرہ کرنا پڑتا ہے یا پھر وہ خون کے ذریعے ہضم ہونے کے عمل کی نگرانی کرتا ہے۔ روزے کے ذریعے جگر توانائی بخش کھانے کو ذخیرہ کرنے سے بڑی حد تک آزاد ہو جاتا ہے۔ اس طرح جگر اپنی توانائی خون میں گلوبلن (Globulin) کی پیداوار پر صرف کرتا ہے۔ جو جسم کو محفوظ رکھنے والے مامون (Immune) نظام کو تقویت دیتا ہے، روزے کے ذریعے گلے اور خوراک کی نالی کے بے حد حساس اعضا کو جو آرام نصیب ہوتا ہے، اس تحفے کی کوئی قیمت ادا نہیں کی جا سکتی۔انسانی معدہ روزوں کے جو بھی اثرات قبول کرے، وہ بے حد مفید ہیں۔ ان کے باعث معدے سے نکلنے والی رطوبتیں بھی بہتر طور پر متوازن ہو جاتی ہیں۔ روزہ کے دوران تیزابیت (Acid) کم جنم لیتی ہے، اگرچہ عام قسم کی بھوک بڑھ جاتی ہے۔ روزے کی نیت اور مقصد کے تحت ہی تیزابیت کی پیداوار رکتی ہے۔ یوں معدے کے پٹھے اور معدے میں رطوبت پیدا کرنے والے خلیے دوران ماہِ رمضان آرام کی حالت میں چلے جاتے ہیں۔ جو لوگ روزہ نہیں رکھتے، ان کے دعوئوں کے برخلاف یہ ثابت ہو چکا کہ ایک صحت مند معدہ شام کو روزہ کھولنے کے بعد زیادہ کامیابی سے ہضم کا کام انجام دیتا ہے۔روزہ آنتوں کو بھی آرام اور توانائی فراہم کرتا ہے۔ یہ فائدہ صحت مند رطوبت کے بننے اور معدے کے پٹھوں کی حرکت سے ملتا ہے۔چھ سات گھنٹے جب آنتوں میں کھانا داخل نہ ہو، تو انھیں خودبخود سکون مل جاتا ہے۔ یوں روزے کے دوران انھیں نئی توانائی اور تازگی ملتی ہے۔ اس طرح ہم ان تمام بیماریوں کے حملوں سے محفوظ ہو جاتے ہیں جو ہضم کرنے والی نالیوں پر ہوں۔ خون پر فائدہ مند اثرات دن میں روزہ رکھنے کے دوران خون کی مقدار کم ہو جاتی ہے۔ یہ اثر دل کو انتہائی مفید آرام مہیا کرتا ہے۔ زیادہ اہم یہ کہ خلیوں کے درمیان مائع کی مقدار میں کمی کی وجہ سے ٹیشو یعنی پٹھوں پر بھی دبائو کم ہو جاتا ہے۔ پٹھوں پر دبائو یا عام فہم الفاظ میں ڈائسٹالک دبائو (Diastlaic) کے لیے انتہائی اہمیت کا حاصل ہے۔ روزے کے دوران ڈائسٹالک دبائو ہمیشہ کم سطح پر ہوتا یعنی اس وقت دل آرام کی حالت میں رہتا ہے۔مزید برأں آج کا انسان جدید زندگی کے مخصوص حالات کی بدولت شدید اعصابی تنائو یا ہائپر ٹینشن (Hypertension) کا شکار ہے۔ رمضان کے ایک ماہی روزے بطور خاص ڈائسٹالک دبائو کم کر کے انسان کو بے پناہ فائدہ پہنچاتے ہیں۔روزے کا سب سے اہم اثر دوران خون کی شریانوں پر پڑتا ہے۔ خون کی شریانیں خصوصاً پُرخوری کے باعث اکثر کمزور پڑ جاتی ہیں۔ یہ عارضہ جنم لینے کی ایک اہم وجہ خون میں غذائی مادوں کا پوری طرح تحلیل نہ ہونا ہے۔ دوسری طرف روزے میں بطور خاص افطار کے وقت خون میں موجود غذائیت کے تمام ذرے تحلیل ہو چکے ہوتے ہیں اور ان میں سے کوئی باقی نہیں بچتا۔ یوں خون کی شریانوں کی دیواروں پر چربی یا دیگر اجزا جم نہیں ہو پاتے اور وہ تنگ ہونے سے محفوظ رہتی ہیں چناںچہ دل کی انتہائی خطرناک بیماریوں سے بچنے کی بہترین تدبیر روزہ ہی ہے، جن میں شریانوں کی دیواروں کی سختی (Arteriosclerosis) نمایاں ترین سمجھی جاتی ہے۔روزے کے دوران گردے بھی جنھیں نظامِ دوران خون ہی کا ایک حصہ سمجھا جا سکتا ہے، آرام کی حالت میں رہتے ہیں۔ اس لیے جسم کے ان اہم اعضا کی قوت بھی روزے کی برکت سے بحال ہو جاتی ہے۔ خلیوں پر روزے کا اثر روزے کا ایک اہم اثر خلیوں اور ان کے اندرونی سیال مادوں کے درمیان توازن قائم رکھنے سے ہے چونکہ روزے کے دوران مختلف سیال مادے کم ہو جاتے ہیں، اس لیے خلیوں کے عمل میں بڑی حد تک سکون پیدا ہوتا ہے۔ خاص طور پر لعاب دار جھلی کی بالائی سطح سے متعلق خلیے جنھیں ایپی تھیلیل (Epithelial) سیل کہتے ہیں اور جو جسم کی رطوبت کے متواتر اخراج کے ذمہ دار ہوتے ہیں، انھیں صرف روزے کے ذریعے ہی آرام اور سکون ملتا ہے۔ یوں ان کی کارکردگی میں اضافہ ہوتا ہے۔ خلویات کے نکتہ نظر سے کہا جا سکتا ہے کہ لعاب بنانے والے (Pituitary) غدود، گردن کے تیموسیہ غدود (Thyroid) اور لبلبہ (Pancreas) کے غدود شدید بے چینی سے ماہ ِرمضان کا انتظار کرتے ہیں تاکہ روزے کی برکت سے کچھ سستانے کا موقع حاصل کر سکیں اور مزید کام کرنے کے لیے اپنی توانائیوں کو جِلا دیں۔ اعصابی نظام پر اثر یہ حقیقت اچھی طرح سمجھ لیجیے کہ دوران روزہ چند لوگوں میں پیدا ہونے والے چڑچڑے پن اور بے دلی کا اعصابی نظام سے کوئی تعلق نہیں ہوتا۔ اس قسم کی صورت حال ان انسانوں میں عموماً انانیت (Egotistic) یا طبیعت کی سختی کے باعث جنم لیتی ہے۔ اس کے برخلاف روزے کے دوران اعصابی نظام مکمل سکون اور آرام دہ حالت میں رہتا ہے۔ عبادات کی بجا آوری سے حاصل شدہ تسکین ہماری تمام کدورتیں اور غصہ دور کر دیتی ہے۔ زیادہ خشوع و خضوع اور اللہ کی مرضی کے سامنے سرنگوں ہونے سے ہماری پریشانیاں بھی تحلیل ہو کر ختم ہو جاتی ہیں۔ چناںچہ دور جدید میں اعصابی دبائو کی وجہ سے جو شدید مسائل جنم لیں، وہ تقریباً ختم ہو جاتے ہیں۔روزے اور وضو کے مشترکہ اثر سے جومضبوط ہم آہنگی جنم لے، اس سے دماغ میں دوران خون کا بے مثال توازن قائم ہوتا ہے۔ یہ بھی صحت مند اعصابی نظام کی نشاندہی کرتا ہے۔ جیسا کہ پہلے بیان ہو چکا کہ اندرونی غدودوں کو جو آرام اور سکون ملے، وہ پوری طرح سے اعصابی نظام پر اثر انداز ہوتا ہے۔ یہ روزے کا انسانی جسمانی نظام پر ایک اور احسان ہے۔انسانی تحت الشعور جو رمضان کے دوران عبادت کی مہربانیوں کے باعث صاف شفاف اور تسکین بخش ہو جاتا ہے، اعصابی نظام سے ہر قسم کا تنائو اور الجھن دور کرنے میں مدد دیتا ہے۔ خون کی تشکیل اور روزے کی لطافتیں خون ہڈیوں کے گودے میں بنتا ہے۔ جب کبھی جسم کو خون کی ضرورت پڑتی ہے، تو ایک خودکار نظام ہڈی کے گودے کو حرکت پذیر (Stimulate) کرتا ہے۔ کمزور اور لاغر لوگوں میں یہ گودا بطور خاص سست حالت میں ہوتا ہے۔ یہ کیفیت شہروں میں رہنے والوں میں بھی ملتی ہے۔ اسی باعث پڑمردہ اور پیلے چہروں میں روزبروز اضافہ ہو رہا ہے۔روزے کے دوران جب خون میں غذائی مادے کم ترین سطح پر ہوں، تو ہڈیوں کا گودا حرکت پذیر ہو جاتا ہے۔ نتیجتاً لاغر لوگ روزہ رکھ کر آسانی سے زیادہ خون پیدا کر سکتے ہیں، لیکن جو شخص خون کی کسی پیچیدہ بیماری میں مبتلا ہو، وہ طبی معائنہ اور ڈاکٹر کی تجویز کو ملحوظ خاطر رکھے چونکہ روزے کے دوران جگر کو ضروری آرام ملتا ہے، سو وہ ہڈی کے گودے کے لیے ضرورت کے مطابق اتنا مواد مہیا کر دیتا ہے جس سے بآسانی اور زیادہ مقدار میں خون پیدا ہو سکے۔یوں روزے کی بہت سی حیاتیاتی برکات کے ذریعے ایک دبلا پتلا شخص اپنا وزن بڑھا سکتا ہے۔ اسی طرح موٹے اور فربہ لوگ بھی صحت پر روزے کی عمومی برکات کے ذریعے اپنا وزن کم کر سکتے ہیں۔ ٭…٭…٭