بندھے پاؤں، ’’خوبصورتی کی ایک پہچان

http://dunya.com.pk/news/special_fea...qCNr8lGm7X.jpg

سالہ لم گوان سیوو کے پاؤں بچپن میں اس مقصد کے لئے باندھے گئے تھے کہ وہ خوبصورت نظر آئیں، اب وہ کہتی ہیں کہ اْنہیں اس پر سخت افسوس ہوتا ہے۔ لم گوان سیوو، چین کے جنوبی صوبے فوجیان میں پیدا ہوئیں، آج کل ملائیشیا میں زندگی بسر کر رہی ہیں۔ عورتوں کے پیر باندھنے کی رسم چین میں تقریباً دسویں صدی سے بیسویں صدی تک رائج رہی۔ عورتوں کے پیر اس طریقے سے باندھے جاتے تھے کہ وہ آٹھ سینٹی میٹر سے لمبے نہ ہونے پائیں۔ ایک عورت کے پیر جس قدر چھوٹے ہوتے تھے، اْتنا ہی اْسے خوبصورت تصور کیا جاتا تھا۔ چین اور جاپان میں چھوٹے پاؤں خوبصورتی کی علامت سمجھے جاتے تھے۔ لم گوان سیوو کے پیراس وقت باندھے گئے، جب وہ سات سال کی تھیں۔ ان کی والدہ ان کے پیروں کی ہڈیوں کو توڑتی تھیں اور پھر اْنہیں سوتی یا ریشمی پٹیوں سے باندھ دیتی تھیں تاکہ ہڈیاں بڑی نہ ہوں یعنی ہڈیوں کی نشو و نما نہ ہو۔ پھر تین سے پانچ دن تک بندھے رہنے کے بعد پیر کھول کر اْنہیں گرم پانی میں رکھا جاتا اور مالش کے بعد پھر سے باندھ دیا جاتا تھا، تاکہ اس طرح ان کی شکل نوک دار بن سکے۔ لم نے بتایا کہ وہ تقریباً ایک سال تک چلنے پھرنے کے قابل نہیں تھیں۔ وہ کہتی ہیں:’’اگر مجھے پھرسے اس بارے میں فیصلہ کرنے کا موقع ملے تو میں یہ کام ہرگز نہیں کروں گی۔‘‘ اگرچہ پیر باندھنے کے اس رواج پر 1912ء میں حکومت کی طرف سے پابندی عائد کر دی گئی تھی لیکن بہت سے خاندانوں میں، خاص طور پر ملک کے دور دراز دیہی علاقوں میں غیر قانونی طور پر چوری چھپے بچیوں کے پیر پھر بھی باندھے جاتے رہے۔ پیر باندھنے کا یہ رواج زیادہ تر امیر اور بارسوخ خاندانوں میں عام تھا۔ اْن کی خواہش ہوتی تھی کہ ان کی بیٹیوں کے پاؤں 8 سینٹی میٹر یا تین انچ سے بڑے نہ ہوں۔ پیر باندھنے کی اس روایت کی سب سے مشہور اور اذیت ناک قسم کو’’ گولڈن لوٹس‘‘ کہتے تھے۔ لم گوان سیوو کہتی ہیں:’’میرا تعلق بہت امیر خاندان سے نہیں تھا لیکن میں نے اپنے پیر اس لئے بندھوائے کہ میری شادی ہو سکے۔‘‘ لم گوان سیوو کے پیر پٹیاں کھولنے کے بعد اب 5 انچ تک لمبے ہوئے ہیں۔ لیکن انہیں چلنے پھرنے کے لئے اب بھی خاص جوتوں کی ضرورت محسوس ہوتی ہے،جو خصوصا پاؤں باندھے جانے والی خواتین کے لئے بنائے جاتے ہیں۔ وہ چین کی ان چند خواتین میں سے ہیں، جو اپنی اس بدصورتی کے ساتھ جی رہی ہیں۔ ان کی نسل کی اکثر خواتین کا اب انتقال ہو چکا ہے۔ لم کے بیٹے کا کہنا ہے کہ جب لم تیس سال کی عمر میں ملائیشیا آئیں، تو اْن سے زبردستی کھیتوں میں کام کروایا گیا، جو کہ اْن کے لئے انتہائی کٹھن تھا۔ جوتے بنانے کا قدیم فن چمڑے سے بنے ہوئے چھوٹے جوتے، جو لم گوان سیوو نے پچھلے ہفتے ملائیشیا کے ساحلی شہر مالاکہ سے خریدے، خاص طور پر اْنہی کے لئے بنائے گئے تھے۔ اس قسم کے جوتے بنانے کا کاروبار اس شہر میں پہلے بہت اچھا تھا۔ جفت ساز یہاں آباد ہونے والی چینی کمیونٹی کے لئے اس قسم کے جوتے بناتے تھے۔ جو تے بنانے کا کاروبار کرنے والے یوو انگ، ٹونی یوو اور ریمنڈ یوو تیسری نسل سے تعلق رکھتے ہیں۔ اْن کے خاندان نے یہاں 1918ء میں یہ کاروبار شروع کیا تھا اور ان کے زیادہ تر گاہک پندرھویں صدی سے یہاں آباد چینی تھے۔ ریمنڈ یووبتاتے ہیں:’’میرے والد مجھے سنایا کرتے تھے کہ ساٹھ اور ستر کی دہائی میں امیر خاندانوں کی یہ خواتین، جن کے پاؤں بندھے ہوتے تھے، اْن کے پاس جوتے بنوانے کے لئے آیا کرتی تھیں۔‘‘ لیکن اب یہ کاروبار ختم ہو رہا ہے اور ٹونی یوو کے مطابق صرف چند خواتین ہی باقی ہیں، جن کے لئے یہ جوتے بنائے جاتے ہیں۔ اب زیادہ تر جوتے یہاں آنے والے سیاحوں کو فروخت کئے جاتے ہیں، جو انہیں یادگار کے طور پر ساتھ لے کر جاتے ہیں۔ ٭…٭…٭ -