بے گناہ کون ہے اس شہر میں قاتل کے

http://www.nawaiwaqt.com.pk/print_im...35177-1562.jpg

ریاستی جبر ہر دور حکومت میں اپنے نئے انداز سے اثر انداز ہوتا ہے۔ حکومت جمہوری ہو یا غیر جمہوری، لیکن جبر کا انداز تو بالکل ہی بے حس، غیر اخلاقی اور بسا اوقات غیر انسانی حد تک بڑھ جاتا ہے۔ جمہور تو عوام کو کہتے ہیں لیکن جمہوریت کا عملی معنی وہ ردائے آھن ہے جو وقت کے جابر اتنی خوبصورتی سے اوڑھتے ہیں کہ عوام کے جذبات فام کو یہ جبری چادر پیراہن محبوب کا نظارہ گلرخ نظر آتا ہے۔ اور وہ اپنے جذبات کی پاکیزگی کو الیکشن کی دھول سے پیدا کردیتے ہیں اور پھر ردائے آھن پوش سونی گلیوں میں فاتح حسن کی طرح اکیلا پھرتا ہے۔ اب چونکہ حسن مفتوح ہے، اسلئے خرابیوں اور فسادیوں کا غول جنات عوام کے سر پر چڑ ھ جاتا ہے اور جبر کا آسیب عوام کی وہ درگت بناتا ے کہ رہے نام اللہ کا۔جبر کرنا اور جبر سہنا اور پھر جبر کو صبر کہنا ہمارے وعظ تازہ کا عنوان جدید ہوتا ہے۔ ’’بہترین جہاد جابر سلطان کے سامنے کلمہ حق کہنا ہے‘‘۔ اب یہ قول رسولؐ ہماری زبانوں پر بھی بہت ہی کم آتا ہے۔ کیونکہ ہمارے دلوں کا مرکز اب تخت جبر کے وہ بے مہر پائے ہیں جو انسانی جذبات سے یکسر خالی ہیں۔ اس لئے صدائے احتجاج اٹھے تو کیا دل میں پیدا ہی نہیں ہوتی ہے۔جبرداروں کا تو اپنا طرز فکر ہے اور اپنا طرز اختیار اور پھر اس اختیار کا استعمال اس محاورے کیمطابق ہوتا ہے کہ ’’ جہیدا ڈنڈا اوہدا سنڈا‘‘
ڈنڈا بھی آہنی ہے اور سنڈا بھی اندھا ہے۔ اسلئے جبرکاری کا عمل نہایت بدسلیقگی سے سرانجام پا رہا ہے۔
جمہوریت کا حسن بہت سے سیاستدان تلاش کرتے ہیں۔ لیکن یہ طائر عنقا ہے۔ جو نام تو رکھتا ہے، وجود بہت ہی مہمل ہے اور جمہوریت کی بد صورتی یہ کہ اپنے مخالفین کو تہہ تیغ کرنے کا غیر عسکری طریقہ ایسا ہو کہ ترقی اور خوشحالی کے ترانے مسلسل بجیں اور جمہور پر اہذا رسانی کا چرکہ بھی جاری ہے۔ جمہوریت کا قافلہ جمہور کش رواں دواں رہا، اسلام آباد کی زمین اختیار پر بھی جمہوریت کا ظلم کش دیو رقص فرما ہوا اور تھک کر 7, 5 جانیں ہڑپ کرگیا۔ اور اس ہفتے میں فیصل آباد میں جمہوریت کا دوستانہ میچ ہوا اور جان کی بازی ہارنے والے میچ ہار گئے۔ جبر دار، خبردار نہیں ہوتے۔کسی زمانے میں جابروں کا محاورہ تھا کہ گدی سے زبان کھینچ لیں گے اب یہ سمجھاتے ہیں کہ بدن سے جان کھینچ لیں گے۔ جلسے ہوئے، جلوس نکلے لیکن ہر دوٹیموں کے خیالات بدلتے ہیں نہ ارمان نکلتے ہیں۔ کچھ زبان دراز زبان کو تخریب کا مسالہ لگا کر یوں بولتے ہیں کہ گویا کاتب تقدیر (معاذاللہ) ان کے ہر لفظ کو مقدس قرار دیدے گا۔ بندگان خدا موت کا کڑوا گھونٹ پیتے ہیں اور یہ لوگ بدمست ترنم سے گاتے ہیں۔
جا رپٹ کرا دے میرے ناں تے
کون رپٹ لکھے گا؟ کیسے لکھے گا؟ اور کب لکھے گا۔ یہ بھی ایک جبر کی کتاب کا ضمیمہ ہے۔جمہوریت کا قافلہ رواں دواں، اتنا بدمست اور اندھا کہ ایک دن نابینا شہریوں نے اپنے حقوق کی بازیابی کیلئے ایک مظاہرہ کیا۔ جمہوریت بردار رہنمائوں کے اشارہ ابرو پر حرکت کرنیوالے پابند حکم قافلہ جمہوریت کی حفاظت پر مامور ہیں وہ صرف حکم کی آنکھ دیتے ہیں۔ اندھے اور بینا کو دیکھنا ان کی فہرست فرائض میں موجود نہیں ہے۔ نابینا، بے سہارا، معاشر ے کے ضعفا اپنی سفید چھڑی سمیت جبر کے ڈنڈے کی زد میں آ گئے اور قومی ذرائع ابلاغ و نشر نے لمحے لمحے کی تصویر کو آشکار کر دیا اور محفوظ کر دیا۔ وہ لوگ جو حقوق کی یازیابی اور بقائے حیات کا جہاد کرتے ہیں وہ سب جمہور ہیں اور جو اس جہاد پر جبر کی فسادی رکاوٹ کھڑی کرتے ہیں وہ جمہوریت کے محافظ ہیں۔جمہوریت مغربی حسینہ اور مشرق کی ڈائن کا یہ بھی کراماتی حیلہ ہے کہ ارکان ایوان پہلے گھر گھر جا کر صبر سے اور جبر سے فقیرانہ بلکہ گداگرانہ انداز لئے ووٹ مانگتے ہیں پھر اسمبلی میں پہنچ کر مراعات مانگتے ہیں اور خوب خوشحال ہو جاتے ہیں اور اگر باہر سے کوئی تنقید کرے تو گروہ جانبازاں کی شکل میں اکٹھے ہو جاتے ہیں اور جمہوریت کے حسن کا اعترافی نغمہ کورس کی شکل میں گاتے ہیں کیونکہ انکے مالی اور معاشرتی مفادات کا تحفظ اسی منتر کے جپنے میں چھپا ہوا ہے لڑائی جا ری ہے زبانی بھی، عملی بھی۔ زبان کے میدان میں جو خوش گفتار داد شجاعت دے رہے ہیں وہ منہ زبانی گفتار کرتے ہیں اور ایسی تیز رفتار کہ زبان خود بھی قاصر فہم ہوتی ہے، دماغ کی باری تو بہت بعد میں آتی ہے۔
بس اب حلقوں کی لڑائی ہے کتنے حلقے ہیں؟ فریقین میں اختلاف پایا جاتا ہے، بے قراری کو قرار نہ آ سکا ہے اس لئے روز نئی کہانی آتی ہے۔ جو انان قوم اگر فوج میں ہوں تو دہشت گردی سے جہاد کرتے ہوئے شہید ہو جاتے ہیں اور اگر شہری زندگی گزار رہے ہوں تو سیاستدانوں کی ہنگامہ خیز خبر بازیوں اور جبر سازیوں سے اپنے قلب و دماغ کو مجروح کروا بیٹھتے ہیں اور یوں جوانان قوم اپنی جان اور صلاحیتوں کی نذر ہی پیش کر رہے ہیں۔ اللہ کرے کہ مقاصد و منزل تک ہمارے رویے پہنچ جائیں تاکہ قوم کی فکری و عملی شناخت اقوام عالم میں اس خوبصورتی سے ہو جائے کہ ہم بجا طور پر سیادت مسلماناں اور امامتِ اُمم کا دعویٰ کر سکیں۔ ملک کی موجودہ صورتحال کی خرابی کے بہت سے خارجی اسباب ہیں اور بہت سے خرابی کے حوالوں کی ابتدا اپنے گھر میں نظر آتی ہیں ۔پاکستان دشمنی اور قائداعظم دشمنی پر بہت گہرا فکری کام ہو رہا ہے اس دشمنی میں بے تدبر، ناقص الفکر، اہل قلم تیغ عداوت سونتے ہوئے ہمہ وقت میدان حرب میں موجود ہیں۔ کچھ اہل قبا ہیں اور کچھ محراب کے چوکیدار ہیں اور منبر پر برسر عام پاکستانیت کو کوسا جاتا ہے۔ پھر یہ مکرو فریب کی قبائے دلفریب میں حکومتی ایوانوں میں موجود ہیں اور حکمرانوں کی خلوتوں کو اپنے تقویٰ و تفکر کی موج بلاخیز سے سیلاب آشنا کرتے ہیں اور ان لوگوں کا تقویٰ و تفکر پرمٹ، پلاٹ، پلازہ، تھری پی کے ترازو میں وزن کیا جاتا ہے اور یہ ہے تقویٰ نہایت نازک ہے کیلے سے ہل جاتا ہے اور فرش مخمل پر پھیل جاتا ہے …؎
کوئی میرے تقوے کو توڑے کیونکر
شرط یہ ہے کہ پازیب کی جھنکار نہ ہو
پازیب کی جھنکار پر ایمان متزلزل ہو جاتا ہے، بیچارے آوارگانِ کوچہ محبوب کہاں جائیں گے۔ چہار جانب قتل ہے قتل ہے۔ قاتل کو سب پہنچاتے ہیں لیکن نگاہ قاتل اور زبان قاتل سے سب ڈرتے ہیں۔