تمھارا نام ایسے ہی میرے ہونٹوں پر کھلتا ہے
اندھیری رات میں جیسے
اچانک چاند بادل کے کسی کونے سے جھانکتا ہے
اور سارے منظروں میں
روشنی سی پھیل جاتی ہے
کلی جیسے لرزتی
اوس کے قطرے پہن کر مسکراتی ہے
بدلتی رت کسی مانوس سی آہٹ کی
ڈولی لے کے چلتی ہے
تو خوش بو باغ کی دیوار سےروکے نہیں رکتی
اسی خوش بو کے دھاگے سے میرا ہر چاک سلتا ہے
تما رے نام کا تارا میری سانسوں میں کھلتا ہے
تمہیں میں دیکھتا ہوں
جب سفر کی شام سے پہلے
کسی الجھی ہوئ گمنام سی چنتاکے جادو میں
کسی سوچے ہوئے بے نام لمحے کی خوش بو میں
کسی موسم کے دامن میںکسی خواہش کے پہلو میں
تواس خوش رنگ منظر میں تمہاری یاد کا رستہ
نہ جانے کس طرف کو جا نکلتا ہے
اور پھر ایسے میں میری ہرراہ کے ہمراہ چلتا ہے
کہ آنکھوں میں ستاروں کی گزرگاہیں سی بنتی ہیں
دھنک کی کہکشائیں سی،
تمہارے نام کے ان خوشنما رنگوں میں ڈھلتی ہیں
کہ جن کے لمس سے جگنو رقص کرتے ہیں
تمیارے خواب کا رستہ میری نیندوں سے ملتا ہے
تو دل آباد ہوتا ہے
میرا ہر چاک سلتا ہے
تمہارے نام کا تارا
میری راتوں میں کھلتا ہے
