Bas Youn Be Dhayani Main Ye Hi Sochte Main Chal Pari Ghar Ki Taraf Aur Pichle Hafte Hui Zindagi Ki Kuch Batain Aur Kuch Problems Mere Zehen Main Soch Ban Kar Intishaar Phailane Lagi.Mujhe Apne Parents Ke Ghar Aaye Abhi Sirf Chaar Maah Ka Hi Waqt Hua Tha.Magar Youn Aksar Itni Muddat Ya Is Se Ziada Waqt Ke Liye Mera Apne Maan Baap Ke Ghar Aa Jana Mere Liye Koi Nai Baat Nahi Thi.Aise Hi Main Jab Bhi Kabhi Apne Maike Aati Toh Mere Shohar Ko Achanak Mujh Se Narazgi Ka Aur Mere Liye La Parwahi Ka Khayaal Aa Jata Tha.Hone Ko Toh Wo Mere Liye Shroo Se Hi La Parwah Rahe .Par Maike Main Unki Taraf Se Mere Liye Ki Gai La Parwahi Mujhe Bhi Kuch Un Se Zidd Pe Majboor Kar Deti Thi.
Bachoun Ko Raaste Main Schools Se Wapas Aate Daikh Kar Mujhe Apne Bachoun Ka Khayal Aaya ,Ke Jin Ko Mere Susral Waloun Ne Mere Jism Ka Hissa Hone Ke Bawajood Meri Rooh Ka Hissa Nahi Hone Dia.Do Char Dinn Hi Inko Main Ne Goad Main Khilaya Toh Mujh Se Mera Ye Mann Chaha Khail Khatam Karawa Liya Gaya.Aur Meri Hi Apni Nand Jis Ki Umar Mujh Se 15 Saal Ziada Hogi Us Ne In Bachoun Ko Apni Goad Ka Khail Bana Liya.Youn Meri Goad Bachoun Se Aur Mera Sath Mere Shohar Se Aahista Aahista Door Kia Jata Raha.
Aur Ab Aaj Is Makaam Pe Aa Kar Mujhe Ehsaas Hua Ke Main Toh Akaili Reh Gai Hoon.Apne Waldain ke Ghar Ayee Thi Kuch Dinn Ke Liye Zindagi Ke Sathi Ki Taraf Se Be Rukhi Paa Kar Yaheen Ki Ho Ke Reh Gai.Hone Ko Toh Mere Hath Aur Meri Jaib Aur Meri Goud Kab Ke Khali The.Shohar Ke Ghar Rehte Bhi Itne Parhe Likhe Shohar Ko Apne Bhaaiyon Ka Mohtaj Hi Paya.Nokri Ya Koi Makaam Mere Shohar Ke Makaam Ke Mutabik Na The.Kion Ke Mere Shohar Ko Toh Aadat Thi Doosoun Ke Tukroun Pe Rehne Ki.Khud Itne Taaleem Yafta Ho Kar Bhi Wo Ye Kaise Bardaasht Kar Paate Ke Unki Bv Bache Khud Mukhtaar Ho Jaayen.Lehaza Sada Bv Aur Bachoun Ko Tarasta Hi Rakha..Itna Tarsaya Ke Bv Bhi Aur Bache Bhi Khud Se Bhi Door Kiye Aur Bv Se Bhi Door Kiye.
Par Aaj Dil Phir Pareshan Ho Raha Tha.Bar Bar Khayal Sata Raha Tha Ke, Kahin Aisa Toh Nahi Ke Mere Shohar Ki Zindagi Main Mere Siwa Aur Koi Hai .Barhaa Kal Sham Se Main Apne Bara-E-Naam Shohar Ko Call Karne Ki Galti Karti Rahi Hoon Par Mere Shohar Se Ye Galti Nahi Sar Zadd Ho Sakti Ke Wo Meri Call Hi Receive Kar Lete.Aurat Hoon Na Toh Dil Ko Chain Nahi Aata..Ye Khayal Bar Baar Dil Main Aa Raha Hai Ke Shayad Aaj Main Apne Shohar Se Do Touk Baat Kahoon Ke Tum Mujhe Suljhe Hue Insaanoun Ki Tarha Bata Do Ke Kia Tumhari Zindagi Main Mere Ilawa Kisi Aur Ki Ehmiyat Hai Joh Tum Raatoun Ko Dair Se Ghar Aate Rahe..Jo Tum Apni PHD Mukkamal Karne Ke Naam Pe Musalsal 6 Saaloun Se Bv Ko Ignore Kiye Hue Ho.Agar Aisa Hai Toh Mujhe Kam Az Kam Is Saza Aur Karb Se Bahar Nikalo.Itni Be Hissi Mat Dikhaow Ke Main Intizar Aur Sirf Intizar Main Jeoon..Go Ke Bara Aziyat Naak Hoga Wo Waqt Ke Jab Mujh Pe Tumhari Ye Haqeeqat Khule Gi Ke Tum Kisi Aur Ke Ho.Par Mujhe Is Aziyat Se Nijaat Mill Jaye Gi Ke Jis Main Main Aaj Hoon , Na Mujhe Apne Aaj Ka Pata Hai Na Mujhe Apne Aane Wale Kal Ka Kuch Andaza.Khuli Aankhoun Se Bhi Band Aankhoun Jaisi Zindagi Jee Rahi Hoon.
Kia Waaldain Apni Betiyoun Ka Hath Isliye Aik Anjan Ke Hath Main De Dete Hain Ke Kahbi Bhi Kisi Bhi Waqt Wo Anjan Insan Raasta Badal Le.Mere Sath Bhi Aisa Hua.Kehne Ko Mere Shohar Mere Mammoo Ke Bete Mere Apne Czn.Par Saaloun Purani Dushmani Mere Mamoon Ne Youn Pal Main Mere Ghar Aa Kar Aur Mera Rishta Maang Kar Khatam Kar Di Thi Ke Un Ke Be Roop Aur Qadre Bure Nain Naqsh Aur Neele Pann Ki Hadd Tak Kaali Rangat Rakhne Wale Bete Ki Ab Tak Shadi Nahi Ho Paaye Thi Ke Jo Mujh Se Kam Az Kam 17 Nahi Toh 15 Saal Toh Bara Hoga Hi.Aur Meri Maan Apne Bichre Bhai Ki Yakdam Rafaqat Ko Aise Mehsoos Kar Gai Jaise Koi Khoyee Cheez Mill Gai Hai Aur Us Ko Sambhaal Kar Rakhna Chahti Hai.Ye Na Sochte Hue Un Se Unke Bete Ke Liye Haan Kar Baithi Ke Bhai Murr Ke Zindagi Main Aaya Hai Toh Bari Izzat De Ga Aur Behen Se Ki Gai Naadaaniyoun Ka Azaala Apni Bahoo Ki Soorat Main Poora Kare Ga.
Par Bhai Ko Toh Jaise Apni Behen Se Sirf Matlab Ka Talluq Tha.Shadi Ke Foran Baad Hi Waise Hi Nazrain Phair Li Aur Wo Hi Naaz Nakhre Aur Khoobsoorat Nazar Aane Wali Bahu Jo Unko Apni Behen Ki Beti Hone Ki Waja Se Aziz Lagi Thi Ab Unko Us Beti Par Aik Rupia Bhi Kharch Karna Gawara Nahi Tha.Bahoo Bana Ke Toh Le Aaye The Par Ye Nahi Jaan Paaye The Ke Beta Agar Bv Ko Payee Payee Ka Mohtaaj Rakhta Hai Toh Kam Az Kam Mamoon Ka Ye Farz Hai Ke Wo Us Bahoo Ke Khayal Rakhain.Magar Aisa Kab Hota Hai.
Garmiyaan Thi Jab Aik Jore Main Yahan Aye Thi Aur Aaj Halki Halki Sardi Shroo Ho Gai Thi.Un Garmiyoun Se Le Kar In Shroo Hoti Sardiyoun Tak Ki Aik Aik Zaroorat Ko Mere Waldain Aise Poori Karne Ki Koshish Kar Rahe The Jaise Kisi Nai Nawaili Jawan Hoti Aulad Ki Khuahishaat Poori Ki Ja Rahi Houn.Kia Issi Liye Mere Boorhe Maan Baap Ne Meri Shadi Ki Thi Ke Ab Bhi Wo Hi Meri Sari Zimmedaariyaan Poori Karain.Unke Liye Toh Ye Kharche Koi Masla Nahi The.Par Mere Liye Toh Ye Ana Ke Masle Bann Gaye The..Mere Liye Toh Meri Mustaqbil Ki Soch Ban Gaye The.Kab Kaise Koun Aur Kia Mera Mustaqbil Hoga.
Aik Shohar Ki Bann Ke Reh Gai Thi.Na Apna Hosh Raha Mujhe Na Apni Zindagi Ka.Magar Ab Hosh Aaya Toh Socha Koi Technical Education Le Loon.Ke Shayad Kal Kuch Kama Kar Apne Bachoun Ko Wapas Laa Sakoon Apne Paas.Kia Issi Liye Mera Shohar Mujhe Rukhsat Karwa Ke Le Gaya Tha Aur Taleem Bhi Adhoori Karwa Di Thi.Kia Issi Liye Ke Kal Ko Wo Mujhe Sahara Bhi Na De Sake Aur Main Dar Badar Apne Mustaqbil Ka Sochne Ke Liye Phiroon..Kion Hosh Nahi Aata Un Larkoun Ko Ke Jo Apni Biwiyaan Banana Ka Toh Shoq Rakhte Hain Par Bv Basane Ka Unko Shoq Nahi Hota.Kion Larke Wale Aise Larkoun Ki Shadiyaan Apne Ball Boote Pe Kar Dete Hain Ke Phir Beta Bahoo Aur Us Ke Bachoun Ka Bojh Bhi Nahi Utha Sakte.Aur Kion Apni Betiyoun Ke Ache Mustaqbil Ka Khuab Daikhte Maan Baap Apni Beti Ko Us Ameer Ghar Main Dhakail Dete Hain Ke Jahan Loug Na Toh Dil Ke Na Hi Soch Ke Ameer Hote Hain.Balke Parhe Likhe Jahil Hote Hain.Kia Aise Hi Sare Waaldain Apni Betiyoun Ke Mustaqbil Ko Bare Makan
Bari Jaaidad Daikh Kar Barbaad Kar Dete Hain..Jab Ke Ye Nahi Daikhte Ke Damaad Ka Dil Bohot Chota Hai Aur Aqal Us Se Bhi Choti.
Gour Kia Jaye Toh Dunia Main 80 Feesad Mard Anaa Parasti Main Jeete Hain , Larki ,Aurat,Ya Female Is Name Se Pehchani Jane Wali Sinf-E-Nazuk Shroo Se Hi Is Moaashre Main Mard Ke Rawaiyoun Ki Mohataaj Rahi Hai.Kabhi Iss Hi Mard Ki Waja Se Aik Beti Ko Uske Parents Taleem Hasil Karne Bhaij Ke Bhi Khof Main Mubtila Rehte Hain, Kabhi Is Hi Mard Ki Waja Se Aurat Ki Azaadi Pe Babandiyaan Hoti Hain,Kabhi Is Hi Mard Ki Waja Se Aurat Ko Jhukna Parta Hai Toh Kabhi Is Hi Mard Ki Waja Se Aurat Ko Qurabaniyaan Deni Parti Hain.
Pata Nahi Kia Kia Khayalaat Meri Soch Ka Markaz The Is Waqt Aur Yakdam Main Chounk Uthi Jab Sath Speed Main Guzarti Hui Aik Car Ke Horn Ne Mujhe Taqreeban Dara Hi Dia.Ye Bhi Aik Mard Ki Hi Harkat Thi Ke Kisi Na Kisi Tarha Aurat Ki Nazar Us Pe Par Jaye.Ya Aurat Apni Nazrain Us Car Ki Taraf Barha De Ke Mard Aurat Ke Chehre Pe Apni Nazar Markooz Kar Sake.
Ye Hi Sochte Sochte Phir Ehsaas Hone Laga Mujhe Ke Meri Ibtidaa Kia Thi Aur Ab Intiha Kia Hogi..Younhi Mujhe Kisi Roz Apni Studies Complete Kar Ke Job Ki Talash Main Nikalna Pare Ga.Aur Younhi Mujhe Gair Na Mehram Mardoun Ki Nazar Ka Nishana Bann-Na Pare Ga.Ye Hai Roodaad-E-Qafas Aik Aurat Ki .Jo Mard Ki Ana Parasti Ka Shikar Hai.
Kia Mard Ye Nahi Soch Sakta Ke Us Ki Sirf Us Ki Aik Nazar Agar Sitam Ki Bajaye Karam Ban Ke Aurat Pe Utre Toh Wo Aik Aurat Ke Makaam Ko Kahan Se Kahan Le Ja Sakta Hai.Kisi Bad Kiradaar Aurat Ko Bhi Agar Paak Nazar Se Daikha Jaaye Toh Wo Aurat Bhi Apni Badkirdari Pe Sharminda Hoti Hai Toh Un Paak Daman Aurtoun Pe Is Nazar-E-Karam Ka Kitna Acha Asar Ho Ga Jo Us Pe Aik Shohar Hone Ke Naate Uthe.Na Ke Aik Ana Parast Aadmi Ki Hasiyat Se.Nazar Wo Ho Ke Jo Mill Ke Uthe Na Ke Nazar Wo Ke Jo Jhuka Ke Uthe…….
Sab Nazar Ki Baat Hai
................_/```\_____Written By___/***
......___________Ruby Akram
