hai bas ki har ik unake ishare mein nishan aur

[Ali_]

hai bas ki har ik unake ishare mein nishan aur
karte hain muhabbat to guzarata hai guman aur


ya rab wo na samajhe hain na samajhenge meri bat
de aur dil unko jo na de mujhko zuban aur













abaru se hai kya us nigah -e-naz ko paiband
hai tir muqarrar magar usaki hai kaman aur













tum shahar mein ho to hamen kya gham jab uthenge
le aayenge bazar se jakar dil-o-jan aur













har chand subukdast hue butshikani mein
hum hain to abhi rah mein hai sang-e-giran aur













hai khun-e-jigar josh mein dil khol ke rota
hote kai jo dida-e-khunnabafishan aur













marata hun is aavaz pe har chand sar ud jaye
jallad ko lekin wo kahe jaye ki han aur













logon ko hai khurshid-e-jahan tab ka dhoka
har roz dikhata hun main ik dag-e-nihan aur













leta na agar dil tumhen deta koi dam chain
karta jo na marata koi din aah-o-fugan aur













pate nahi jab rah to chad jate hain nale
rukati hai meri taba to hoti hai ravan aur













hain aur bhi duniya mein sukhanavar bahut ache
kahate hain ki ‘ghalib’ ka hai andaz-e-bayan aur