گِرا ہوں شجر سے اُڑا چاہتا ہوں

[intelligent086]

گِرا ہوں شجر سے اُڑا چاہتا ہوں

پئے رقص، لطفِ ہوا چاہتا ہوں

وہی جو منگیتر سا ہے مجھ سے، مخفی

وہ منظر، نظر پر کھُلا چاہتا ہوں

سبھی ناؤ والے ہیں، اِک میں نہیں ہوں

کہ تنکے کا جو، آسرا چاہتا ہوں

گریزاں ہوں ابنائے قابیل سے میں

کہ شانوں پہ یہ سر، سجا چاہتا ہوں

وہی شہ رگوں میں جو پنہاں ہے، اُس کا

سرِ طُور کیوں سامنا چاہتا ہوں

(ق)

گوارا ہو بے ناپ خلعت مجھے کیوں

جو زیبا مجھے ہو قبا چاہتا ہوں

نہیں چاہتا تاج میں پاپیادہ

میں توقیر، حسبِ انا چاہتا ہوں

لگے جیسے پہرے ہوں ہر اور میری

کہوں کس سے ماجدؔ، میں کیا چاہتا ہوں

٭٭٭