jii chaahta hai, kisne kahaa, mat Khariidiye
daulat se husn, husn se daulat Khariidiye

kuchh log jii rahe haiN sharaafat ko bech kar
thoRhii-bahut unhiiN se sharaafat Khariidiye

phaila hai kaaro_baar-e-muravvat, so aap bhii
sab kii tarah kisii kii zaroorat Khariidiye

apnii pasaNd apne muqaddar kii baat hai
sub'h-e-azal se shaam-e-qayaamat Khariidiye

gahraaiyoN kii fikr meN kyoN mubtala haiN aap
likhiye Ghazal avaam pe, shoharat Khariidiye

kahte haiN jisko she'r duaa ka muqaam hai
rusvaaiyaaN kamaaiye, ibrat Khariidiye

aaNkheN rahiiN to raNg bahut, roshanii bahut
ab ho sake to parda-e-Ghaflat Khariidiye

kyoN aap sharm_saar haiN apne vujood se
sach boliye, jahaaN kii adaavat Khariidiye

duniya ke rog jheliye kamre meN baiTh kar
khiRhkii ke paas jaaiye, hasrat Khariidiye

umr-e-aziiz, waqt nahiiN mol-tol kaa
baazaar uTh chuka, ajii hazrat, Khariidiye

be_raNg hai hikaayat-e-khoon-e-jigar ''KhizaaN''
khoon-e-jigar se raNg kii qiimat Khariidiye

Mahboob ''KhizaaN


Similar Threads: