لوگ سوچتے کیسے ہیں؟

**intelligent086** · 07-14-2015, 08:40 AM

مقبول ملک فیس بک کے بانی مارک زوکربرگ کو فارمولے کی تلاش
فیس بک کے شریک بانی مارک زوکربرگ ان دنوں یہ سمجھنے کی کوشش کر رہے ہیں کہ کوئی تو ایسا فارمولا ہو گا جس کے ذریعے یہ وضاحت کی جا سکے کہ لوگ آخر سوچتے کیسے ہیں؟امریکی ریاست کیلی فورنیا کے شہر سان فرانسسکو سے ملنے والی رپورٹوں کے مطابق اپنے فیس بک پیج پر سوال و جواب کے ایک طویل سلسلے کے دوران مارک زوکربرگ نے عالمی شہرت یافتہ ماہر طبیعیات اسٹیفن ہاکنگ کو بتایا کہ ان کی خواہش ہے کہ وہ یہ سمجھ سکیں کہ لوگ کس طرح سوچتے ہیں؟؟؟ اس آن لائن چَیٹ فورم میں اسٹیفن ہاکنگ نے زوکربرگ سے پوچھا تھا کہ آیا ان کے ذہن میں سائنس سے متعلق کوئی ایسا سوال ہے، جس کے جواب کی تلاش کے وہ خواہش مند ہوں۔ اس پر مارک زوکربرگ نے لکھا ’’میری سب سے زیادہ دلچسپی انسانوں سے متعلق سوالات میں ہے۔‘‘ پھر زوکربرگ نے اس فیس بک بحث کے دوران مختلف موضوعات کی ایک ایسی فہرست بھی لکھ دی، جس میں دماغ کی کارکردگی اور لافانیت یا ابدیت جیسے موضوعات بھی شامل تھے۔ مارک زوکربرگ نے اسٹیفن ہاکنگ کو لکھا ’’میں یہ جاننے کے لیے بڑا متجسس ہوں کہ آیا ریاضی کا کوئی ایسا بنیادی قانون موجود ہے، جس کی مدد سے انسانوں کے سماجی رشتوں کی وضاحت کی جا سکے اور جو یہ سمجھنے میں مدد دے سکے کہ ہم ان خیالات کے مابین توازن کیسے قائم کرتے ہیں کہ کوئی انسان کسی دوسرے انسان یا شے کو اگر اہمیت دیتا ہے تو کیوں اور کیسے؟‘‘ اس پر اسٹیفن ہاکنگ نے کہا ’’میں شرط لگا سکتا ہوں کہ ایسا کوئی نہ کوئی فارمولا ہے۔‘‘ اس آن لائن فورم میں ہالی وڈ کے سٹار اداکار، باڈی بلڈنگ کے سابقہ عالمی چیمپئن اور کیلیفورنیا کے سابق گورنر آرنلڈ شوارزنیگر بھی شامل تھے۔انہوں نے مارک زوکربرگ سے پوچھا ’’آپ کرہ ٔارض کے مصروف ترین انسانوں میں سے ایک ہوں گے۔ آج کی نوجوان نسل خود کو پاپائے روم کی نسبت شاید آپ کے زیادہ قریب محسوس کرتی ہو گی۔ آپ ورزش کے لیے اگر کوئی وقت نکال پاتے ہیں تو کتنا اور کس طرح؟‘‘۔ اس پر فیس بک کے شریک بانی نے اپنے جواب میں لکھا ’’میں ہر ہفتے کم از کم تین مرتبہ جسمانی ورزش کے لیے وقت نکال لیتا ہوں۔ زیادہ تر صبح کے وقت۔ میں جب بھی جاگنگ کے لیے جاتا ہوں، اپنے کتے کو بھی ساتھ لے جاتا ہوں‘‘۔اسی فورم میں زوکربرگ سے جب یہ پوچھا گیا کہ ان کے نزدیک خوشی کی تعریف کیا ہے، تو انہوں نے کہا ’’بہت سے لوگ خوشی کو تفریح کے ساتھ گڈ مڈ کر دیتے ہیں۔ وہ سب کچھ جس پر آپ کا یقین ہو، آپ وہ سب کچھ ایسے لوگوں کے ساتھ مل کر کریں، جنہیں آپ چاہتے ہوں، یہی خوشی ہے۔‘‘ ٭…٭…٭