میکسیکو :زمین میں دھنستا شہر...!

**intelligent086** · 06-26-2015, 09:27 AM

فرزانہ نگہت
میکسیکو سٹی سطح سمندر سے سات ہزار ساڑھے تین سو فِٹ کی بلندی پہ واقع دنیا کا بلند ترین اور تیز رفتار آبادکاری والا شہر ہے۔ اس کی آبادی دو کروڑ سے زائد اورشکاگو سے تین گُنا زیادہ ہے۔ اسے دیکھتے ہوئے کسی کو بمشکل یقین آئے گا کہ یہ عظیم شہر اپنی بقا کی جنگ میں فیصلہ کن مرحلے پر پہنچ چکا…کیوں کہ وہ رفتہ رفتہ زمین کے اندر دھنس رہا ہے۔اس عظیم شہر کے غیر محسوس طریقے سے زیرزمین دلدل میں دھنسنے کی رپورٹیں نصف صدی قبل ماہرین ِ ارضیات نے جاری کی تھیں،لیکن انھیں درخورِاعتنا نہ سمجھا گیا۔ ان انتباہی رپورٹوں کی صداقت کا ثبوت اس وقت منظرِعام پر آیا جب 1950ء میں شہر کے وسیع وسطی علاقے کئی فِٹ بلند سیلابی پانی میں ڈوبنے لگے۔ یہ علاقے بیس برس میں بیس فٹ تک زمین کے اندر دھنس گئے۔دھنسنے کی رفتار غیرمعمولی طور پر تیز تھی۔ شہر کی پیدل راہیں اور سڑکیں جو ایک دن ہموار دکھائی دیتی تھیں، اگلے ہی دن کہیں سے پست کہیں سے بلند دکھائی دینے لگیں۔ اکثر عمارتیں پیسا کے مینار کی طرح ایک طرف جھک گئیں جس وجہ سے کچھ عمارتیں گرانا پڑیں۔ سنگِ مرمر سے تعمیر شْدہ پیلس آف فائن آرٹس جو1935ء میں مکمل ہوا تھا، پندرہ برس کے دوران اتنا گہرا زمین میں دھنس گیا کہ اس کی دوسری منزل سطحِ زمین تک آ پہنچی۔ اس کے آس پاس کی زمین بھی دلدلی بنتی جا رہی تھی۔ 1951ء میں دھنسائو کی رفتار اتنی تیز ہوگئی کہ اسے روکنے کے لیے جنگی بنیادوں پر کام کرنا پڑا، لیکن سر توڑ کوششوں کے باوجود دھنسنے کی رفتار کو کم نہ کیا جا سکا چناںچہ میکسیکو کا یہ دارالحکومت پانچ تا آٹھ انچ فی سال کے حساب سے زمین میں دھنستا رہا۔اگر یہ شہر اپنی غرقابی یا مکمل دھنسائو کے خطرے سے دوچار ہے تو اس کا سبب ’’پانی کی قلت‘‘ ہے۔ صدیوں تک اس شہر کو کنوئوں کے ذریعے پانی مہیا کیا جاتا رہا۔ رفتہ رفتہ آبادی میں زبردست اضافے کے ساتھ پانی کی طلب اور استعمال میں بھی اضافہ ہواچونکہ پانی نیچے سے کھینچ کھینچ کر نکالا جاتا رہا، لہٰذا زمین میں دھنسائو کا عمل شروع ہوگیا۔ لوگ گویا اپنے گھروں کی بنیادیں کھوکھلی کرنے لگے۔بھاری بارشوں کے بعد پانی کی نکاسی کا مسئلہ بھی الگ دردِ سر بن جاتا۔میکسیکو سٹی آتش فشانی سلسلہ ہائے کوہ، ایناہواک کی وادی میں پھیلا ہوا ہے۔ 1325ء میں آزٹک انڈینوں کے ہاتھوں بنیادیں رکھے جانے کے بعد سے اسے آئے دن سیلابوں کا سامنا ہے۔ جب آزٹک وہاں پہنچے تو وادی کا غالب حصہ جھیلوں سے بھرا ہوا تھا۔ انھوں نے جھیلوں کے درمیان ایک جزیرے میں اپنے عظیم شہر ’’ٹینو چٹیٹلان‘‘ کی بنیاد رکھی۔ وہاں سے زمین کی طرف کئی راستے نکلتے تھے۔ یہ جگہ نہروں اور آب راہوں سے بھری ہوئی تھی‘ اس لیے نقل و حمل کے واسطے کشتیاں اور بجرے استعمال ہوتے۔جب 1521ء میں ہسپانوی بحری مہم جوئوں نے اس شہر پر قبضہ کیا، تو انھوںنے آزٹکوں کی تعمیر کردہ تمام عمارتیں مسمار کر دیں۔ بجرے اور کشتیاں سب بربادہوئیں اور بیگار میں پکڑے ریڈ انڈینوں کے ذریعے اتھلے پانیوں والی جھیلوں کا پانی نکال نکال کر انھیں پاٹ دیا گیا۔ اس طرح وہاں ’’نیوسپین‘‘ کا دارالحکومت… میکسیکو سٹی ہسپانوی شہر والے خدوخال لیے نمودار ہوا۔اس دوران ہسپانوی بطور ایندھن اور چاندی کی کانوں میں استعمال کرنے کے لیے مسلسل درخت کاٹتے رہے۔ سو گرد و غبار کے طوفانوں کے ساتھ جو سیلاب آتے وہ اس لیے بے حد تباہی و بربادی مچاتے کہ پہاڑی ڈھلوانوں پر انھیں روکنے والے درخت نہیں رہے تھے۔ سیلابوں کی تباہ کاریوں کے پیشِ نظر چند سال بعد پانی روکنے کے لیے پہاڑیوں کے دامن میں ایک چار میل لمبی خندق اور نکاسی آب سرنگ کھودی گئی۔ لیکن مٹّی کے کٹائو نے پانی کے بہائو میں رکاوٹیں پیدا کرنی شروع کر دیں۔ 1629ء میں چھتیس گھنٹوں کی لگاتار موسلادھار بارشوں سے تیس ہزار کے قریب نفوس پانی میں ڈوب کر اور بارشوں سے کمزور پڑتی عمارتیںکے گرنے سے ہلاک ہوگئے۔ اس پر چند نو آبادیاتی حکام نے تجویز پیش کی کہ دارالحکومت کسی اور جگہ منتقل کر دیا جائے، لیکن وہاں جن لوگوں نے بھاری سرمایہ کاری کر رکھی تھی، انہوں نے شدومد سے اس کی مخالفت کی۔ سو تجویز پر عملدرآمد نہ ہوسکا۔اگلی پانچ صدیوں کے دوران شہر کی آبادی میں اضافہ ہوتا رہا۔ 1845ء کے اختتام تک وہ دو لاکھ چالیس ہزار تک جا پہنچی۔ 1930ء میں یہ دس لاکھ تک پہنچ گئی۔ بیس سالوں میں تین گنا بڑھی، پھر اگلے پندرہ سالوں میں دو گنا۔ ساتھ ساتھ شہر دھنسنے کا عمل بھی جاری رہا۔ اس نے لوگوں کو چونکانا بھی شروع کر دیا۔ 1938ء اور 1880ء کے درمیان دھنسائو کا عمل ڈیڑھ اِنچ فی سال تھا، لیکن اگلے آٹھ سالوں میں یہ آٹھ فِٹ تک زمین میں دھنس چکا تھا۔ اب شہر کا دھنسائو مقامی باشندوں کو خوف زدہ اور پریشان کرنے لگا۔ وہ اپنی آنکھوں سے دیکھ رہے تھے کہ دھنسنے کے عمل سے نتائج سامنے آ رہے ہیں۔ شہر کا قدیم ترین گرجا، سانتا ماریا ایک طرف سے ترچھا ہو گیا۔ عمارت میں دراڑیں پڑ گئیں۔ دیگر یادگار عمارتیں بھی اسی حالت سے دوچار تھیں۔ پانی کے ذخائر اور بدروئیں ٹوٹنا پھوٹنا شروع ہوگئیں۔ 1900ء میں شہر کے گندے پانی کی نکاسی کے لیے تیس میل لمبی نہر کھودی گئی جو ڈھلوانیں اترتی دور پہاڑوں میں بنائی ایک سرنگ میں جا داخل ہوتی۔ یوں استعمال شْدہ پانی شہر میں یا اس کے قرب وجوار میں نہ ٹھہرتا۔اس کے باوجود 1950ء میں شہر بیس فِٹ تک دھنس گیا اور گندے پانی کو پمپوں کے ذریعے نہر میں ڈالنا پڑا۔ انجینئروں نے خبردار کیا کہ بھاری بارشیں یا پمپنگ میں ذرا سا بھی تعطل تباہ کن ثابت ہوگا۔ 1951ء میں آنے والے سیلاب نے یہ بات واضح کر دی کہ فوری طور پر ہنگامی اقدام کی واقعی ضرورت ہے۔ 1952ء میں ارنسٹوارچرو جب میکسیکو سٹی کا میئر بنا تو اسے دو سنگین قسم کے مسائل کا سامنا کرنا پڑا۔ اوّل پانی کی پائپوں کے ذریعے فراہمی تاکہ کنوئوں سے پانی کھینچا جانا ممنوع قرار پائے۔ دوسرے گندے پانی کی تیز رفتار نکاسی کا انتظام۔ اس نے شہر میں مختلف مقامات پر بڑے بڑے تالاب بنوائے تاکہ بارشوں کا پانی ان میں ذخیرہ ہوسکے، پھر اسے پمپوں کے ذریعے شہر سے باہر نکال دیا جاتا۔ اس نے شہر کے گرد بڑے بڑے نالے بھی تعمیر کروائے تاکہ پہاڑوں سے آنے والا پانی شہر میں داخل نہ ہو سکے۔ اس نے تیس کے قریب نئے پمپنگ اسٹیشن بھی تعمیر کروائے۔ نیز نجی ملکیت کے چھے ہزار کنوئوں میں سے پانچ ہزار بند کروا دیئے۔ یوں شہر کے دھنسائو کا عمل وقتی طور پر رُک گیا،لیکن ان تمام اقدامات کے باوجود-63 1962ء کی تیز و تند بارشوں نے بڑی نہر کو لبالب بھر دیا۔ اگر اس پانی کی سطح چند اِنچ اور بلند ہوجاتی تو تمام شہر پانی میں ڈوب جاتا۔ شہر کے باہر جو چند سو نئے کنوئیں کھودے گئے تھے‘ ان کی بدولت شہر کے دھنسنے کا عمل پھرشروع ہو گیا۔ چودہ برس کی سخت ترین کوششوں کے باوجود ابھی بہت کچھ کرنا باقی تھا۔جب کوئلہ اور تیل زمین سے نکالے جائیں تو سطحِ زمین ناہموار اور بھربھری ہوجاتی ہے۔ اس میں کٹائو اور دھنسائو کا عمل شروع ہوجاتا ہے، لیکن میکسیکو سٹی ہی دنیا میں ایسی واحد مثال ہے جہاں سطحِ زمین کے بگاڑ کا سبب زیرِ زمین پانی کی گھٹتی سطح ہے۔ لاطینی امریکا کی بلند ترین عمارت 55 منزلہ ’ٹورے مائیور‘‘ بھی دلدل میں تیر رہی ہے۔ اسے مکمل طور پر زمین میں غرق ہوجانے سے بچانے کے لیے اس کے نیچے سٹیل اور کنکریٹ کے فرش اور ستون لگائے گئے ہیں۔ عمارت کو سہارا دینے کے لیے چاروں طرف دیوہیکل ’’کنڈے‘‘ بھی لگے ہیں۔پاسیو ڈی لا ریفارما میں امریکی سفارت خانے کی عمارت بھی کنکریٹ کے بہت بڑے تختے پر تعمیر کی گئی۔ یہ بھی زیرِ زمین دلدل میں تیر رہی ہے۔ جب کبھی زلزلے کے جھٹکے لگیں جو میکسیکو سٹی میں معمول کی بات ہیں تو یہ عمارت بری طرح لرزنے ڈولنے لگتی ہے۔ میکسیکو سٹی کے وسیع و عریض اور خوبصورت ہوائی اڈے کا زیادہ تر رقبہ سیم زدہ اور دلدلی ہے۔ یہ اس جگہ واقع ہے جہاں پہلے جھیل ٹیکسکو واقع تھی۔ جھیل کو سابقہ حالت میں لانے کے لیے یہ تجویز زیرغور ہے کہ اس جگہ ایٹمی دھماکا کر دیا جائے۔ یوں شہر کے تمام گندے پانی کو وہاں قابلِ استعمال بنا کراسے گرین بیلٹ میں ڈالا جائے گا۔ ایک منصوبہ یہ ہے کہ اسّی فِٹ کی گہرائی میں سیم نالہ تعمیر کیا جائے جو کئی میل لمبا ہو۔اس کے ذریعے زیرزمین پانی زمین کے اندر ہی شہر سے باہر نکال دیا جائے۔ اس سیم نالے کی تعمیر میں ورلڈ بینک نے حکومت ِ میکسیکو کو ایک خطیر رقم بطورِ امداد دی ہے۔ مزید آب راہوں کی تعمیر بھی زیر غور ہے۔ ماہرین کا کہنا ہے کہ اگر شہر کا دھنسائو روکنا مطلوب ہے تو باقی ماندہ کنوئوں سے پانی نکالناروک دیا جائے۔ ٭…٭…٭