Originally Posted by
intelligent086
میلاد
سیّال ماہ تابِ زر فشاں کی دھوم ہے
بدلے ہوئے تصوّرِ ایماں کی دھوم ہے
ایمان سے لطیف تر عصیاں کی دھوم ہے
اعلانِ سرفروشئ رِنداں کی دھوم ہے
باراں کے تذکرے ہیں بہاراں کی دھوم ہے
اب سرنگوں ہے کتنے بزرگانِ فن کی بات
اب پیشِ مُحکمات گُریزاں ہیں ظنّیات
اب محض سنگِ میل ہیں کل کے تبرُّکات
مُدّت سے اب نہ کوئی عجوبہ نہ معجزات
دنداں شِکن حقیقتِ عریاں کی دھوم ہے
اک بات آگہی کے لبوں سے نکل گئی
شمعِ نگاہِ اہلِ قدامت پگھل گئی
فولاد کی قدیم حکومت بدل گئی
اک جنبشِ نگاہ سے زنجیر گل گئی
زنداں میں طمطراقِ اسیراں کی دھُوم ہے
٭٭٭
