شہد سمندر
ترے شبدوں میں
شہد سمندر
ترے ہونٹوں میں
تخلیق کی ابجد
تری آنکھوں میں
کئ عرش سجے
ترے پیروں میں
جیون ریکھا
تری سانسوں میں
آج اور کل
تری کھوج کا پل
صدیوں پر بھاری
ترے ملن کے عشرے
جاپیں پل دو پل
ترے سوچ کے آنگن میں
کن کے بھید چھپے
تو چھو لے تو
مٹی سونا اگلے
پتھر پارس ٹھہرے
تری ایڑ کے اندر
احساس کے سات سمندر
ترا دامن
فرشتوں کا مسکن
تو وہ برگد
چرا کر سایہ جس کا
آکاش اترائے
میں اپنے بخت پر نازاں ہوں
تو مری ماں کہلائے
ترے سینے میں
مری پیاس کےدیپ جلیں
ماں کے دل کی دھک دھک
خلد کے گیت سنائے
