روس کا 60 امریکی سفارتکار ملک بدر کرنے کا اعل&

روسی وزیر خارجہ سرگئی لاروف کا کہنا ہے کہ ماسکو اپنے سفارتکاروں کی ملک بدری کے جواب میں امریکا کے 60 سفارتکاروں کو ملک بدر اور سینٹ پیٹرزبرگ میں اس کا قونصل خانہ بند کرے گا۔
روس کی جانب سے یہ قدم سابق ڈبل ایجنٹ سرگئی اسکریپال کو زہر دیئے جانے کے بعد برطانیہ سے اظہار یکجہتی کے طور پر روسی سفارتکاروں کو امریکا سے ملک بدر کرنے کے بعد اٹھایا گیا۔
غیر ملکی خبر رساں ایجنسی ’اے ایف پی‘ کے مطابق ماسکو میں پریس بریفنگ کے دوران سرگئی لاروف نے کہا کہ روس میں تعینات امریکی سفیر کو اس ’جوابی اقدام‘ سے آگاہ کر دیا گیا ہے۔
انہوں نے کہا کہ ’امریکا نے ہمارے جتنے سفارتکاروں کو ملک سے بےدخل کیا ہم بھی اس کے اتنے ہی سفارتکار ملک بدر کر رہے ہیں، ساتھ ہی میں سینٹ پیٹرزبرگ میں امریکی قونصل خانے کو کام کی اجازت نہ دینے کا بھی فیصلہ کیا گیا ہے۔‘
واضح رہے کہ چند روز قبل امریکا نے60 روسی سفارتکاروں کی بے دخلی کا حکم جاری کرتے ہوئے امریکی شہر سیٹل میں واقع اس کے قونصل خانے کو بند کرنے کا بھی اعلان کیا تھا۔
روسی وزیر خارجہ کا کہنا تھا کہ ’روس دیگر ممالک کو انہی کے انداز میں جواب دے گا۔
برطانوی حکومت نے اپنے شہر سیلزبری میں سرگئی اسکریپال اور ان کی بیٹی یولیا کو زہر دینے کا الزام روس پر لگایا تھا۔
سرگئی لاروف نے کہا کہ ’روسی سفارتکاروں کو بےدخل کرنے والے دیگر ممالک کے بھی اتنے ہی سفارتکار ملک بدر کیے جائیں گے۔
انہوں نے کہا کہ ’روس ان انتہائی ناقابل قبول کارروائیوں کا جواب دے رہا ہے جو سرگئی اسکریپال کے نام نہاد کیس میں امریکا اور برطانیہ کے دباؤ میں آتے ہوئے ہمارے خلاف کی گئیں۔
روسی وزیر خارجہ نے برطانیہ پر ہر ملک کو روس مخالف کارروائیوں کا حصہ بننے کے لیے مجبور کرنے کا الزام لگایا۔
ان کا کہنا تھا کہ جمعرات کے روز ہی برطانیہ نے ماسکو کو یولیا اسکریپال کی صحت سے متعلق آگاہ کیا۔
انہوں نے کہا کہ ’ہم سرگئی اسکریپال کو زہر دینے کے معاملے پر سچ سامنے لانا چاہتے ہیں۔
ساتھ ہی انہوں نے برطانیہ پر بین الاقوامی قوانین کا مذاق بنانے کا بھی الزام لگایا۔