ٹویٹر کا کاٹا پانی نہیں مانگتا

غور کریں تو نواز شریف کا کم مذاق اڑائے جانے کی بڑی وجہ یہ ہے کہ وہ پبلک سے دور رہتے ہیں۔ پچھلے دنوں خلاف معمول پبلک میں نکل آئے تو پورا سوشل میڈیا گونج اٹھا ”مجھے کیوں نکالا“۔ یہ جملہ اب ضرب المثل کی حیثیت اختیار کر گیا ہے۔
شہباز شریف پبلک میں نکلنے کے شوقین ہیں تو ان کا کباڑا کیا جاتا ہے۔ مائیک گرانے پانی میں کھڑے ہونے اور پنجاب اسپیڈ پر ان کے ساتھ ستھری ہوتی ہے۔ قرائن سے اندازہ ہو رہا ہے کہ شہباز شریف کو خود آئیڈیا ہو گیا ہے کہ ایسی حرکتیں کرنے سے شہرت تو ملتی ہے مگر ویسی ہی جیسی چچا چھکن کو نصیب ہوتی تھی۔ یعنی لوگ لطیفہ بنا کر مشہور کر دیتے ہیں۔ اب اس دور وزارت میں وہ کسی برساتی پانی میں کھڑے دکھائی نہیں دیے۔

عمران خان صاحب نہ تو اسپیکر سے دور رہ سکتے ہیں اور نہ ٹویٹر سے۔ اس لئے اپوزیشن میں رہ کر بھی وہ حکومت کے مزے لوٹتے ہیں۔ یعنی بیشتر عوام حکومت کی بجائے ان کا مذاق اڑاتے پائے جاتے ہیں۔ یہ غالباً تاریخ عالم کی واحد اپوزیشن ہے جس کو میڈیا میں حکومت سے زیادہ مذاق کا نشانہ بنایا جاتا ہے۔
آپ کو اس تھیوری پر یقین نہیں آ رہا تو ٹویٹر والے دوسرے خاکی و فانی حضرات پر یہ تھیوری چسپاں کر کے دیکھ لیں۔ بلکہ دور کیوں جاتے ہیں۔ ٹرمپ صاحب ایک عبرت ناک مثال بنے موجود ہیں۔ تو صاحبو بات بس اتنی سی ہے کہ بندہ اپنی بے عزتی کروانے کا شوقین ہو تو ٹویٹر سے بہتر کوئی دوسرا میڈیا مشکل سے ہی ملے گا۔
شاید اس کی وجہ یہ ہے کہ بندہ ایک جملہ لکھتے ہوئے زیادہ سوچنے کی ضرورت محسوس نہیں کرتا ہے۔ بس دھن سے داغ دیتا ہے۔ اس کے بعد جب دنیا بھر سے دے دھنادھن شروع ہوتی ہے تو پتہ چلتا ہے کہ یہ گولہ تو اپنے قلعے پر ہی آن لگا ہے۔ یہ شاٹ تو اپنے ہی گول میں جا گری ہے۔ اس کے بعد عظیم لیڈر کی پبلک ریلیشن ٹیم کی دوڑیں لگ جاتی ہیں کہ ڈیمیج کنٹرول کیسے کریں۔ ابھی اس ٹیم کا سانس ہی قابو نہیں آتا کہ اگلی ٹویٹ آ جاتی ہے۔ یوں گریٹ لیڈر مزید گریٹ بن جاتا ہے۔

بشکریہ ….. عدنان خان کاکڑ