ڈپو
کلام: صوفی شاعر حضرت غلام حضور شاہ
معاف کر توں سائیں ایویں مغز نہ کھپائیں
شکر کر رب دا سائیں ایتھوں جا ہن دوڑ
ڈپو والیا ماہیا سانوں آٹے دی لوڑ
چھڈ دے بلیکاں ناں بن ایویں چور
راشن کاٹ پھڑائیے منہوں پئے وڈیائیے
گلاں نال پیے تڑائیے سانوں آٹے دی لوڑ
ڈپو والیا ماہیا سانوں آٹے دی لوڑ
چھڈ دے بلیکاں ناں بن ایویں چور
زنانیاں بچے وچارے لاون ڈاہڈے پئے چارے
منتاں کر کر ہارے آ گیا اے کیہو جیا دور
ڈپو والیا ماہیا سانوں آٹے دی لوڑ
چھڈ دے بلیکاں ناں بن ایویں چور
اک زنانی سی بولی آڈ کے اوہ جھولی
تینوں وجے وے گولی تیری چھڈاں طعون مروڑ
ڈپو والیا ماہیا سانوں آٹے دی لوڑ
چھڈ دے بلیکاں ناں بن ایویں چور
مائی کیوں پئی بولیں میرے پہت پئی کھولیں
میری عجت پئی رولیں نئیں دینا آٹا لا لئے زور
ڈپو والیا ماہیا سانوں آٹے دی لوڑ
چھڈ دے بلیکاں ناں بن ایویں چور
وے میں تینوں آکھاں تیریاں پھن دیاں کھاکھاں
چھڈ تکبر تینوں ٹھاکاں لد گئے نیں لکھ کروڑ
ڈپو والیا ماہیا سانوں آٹے دی لوڑ
چھڈ دے بلیکاں ناں بن ایویں چور
ایتھوں ٹر جا مائی آٹا ہیگا نئیں کائی
ایویں ڈنڈ توں پائی ٹر جا پا نہ شور
ڈپو والیا ماہیا سانوں آٹے دی لوڑ
چھڈ دے بلیکاں ناں بن ایویں چور
لڑ کے گھر ول آوے منڈا ٹکروں پیا کرلاوے
چھابہ پھول وکھاوے ٹکروں پئی اے تھوڑ
ڈپو والیا ماہیا سانوں آٹے دی لوڑ
چھڈ دے بلیکاں ناں بن ایویں چور
مائی خیر جے پاویں میوے بہشتاں دے کھاویں
نالے بخشی توں جاویں چھٹین عذابوں وچ گور
ڈپو والیا ماہیا سانوں آٹے دی لوڑ
چھڈ دے بلیکاں ناں بن ایویں چور
فیر بازار نوں آئی قیمت پنجاہ سنائی
چلے وا ناں کائی پئی آٹے دی لوڑ
ڈپو والیا ماہیا سانوں آٹے دی لوڑ
چھڈ دے بلیکاں ناں بن ایویں چور
بازاروں آٹا لیاوے بہہ کے روٹی پکاوے
سو سو پلوتے سناوے سوالیاں پایا اے زور
ڈپو والیا ماہیا سانوں آٹے دی لوڑ
چھڈ دے بلیکاں ناں بن ایویں چور
فقیر گاوندے نیں گانا ہر پاسے آٹے دا رونا
خرچا ہو گیا اے چونا ہون تاں ہو گئے آں بور
ڈپو والیا ماہیا سانوں آٹے دی لوڑ
چھڈ دے بلیکاں ناں بن ایویں چور
٥ اگست ١٩٧٦
