عالمی معلومات

عالمی معلومات

http://dunya.com.pk/news/special_fea...natwjzS_ga.jpg

عارف جان
سب سے چھوٹا ملک :ویٹیکن سٹی دنیاکا سب سے چھوٹا ملک ہے۔اس کارقبہ ایک مربع میل کے چھٹے حصے (0.44مربع کلومیٹر )سے کچھ ہی زیادہ ہے اور آبادی صرف پندرہ سو افراد پر مشتمل ہے۔ویٹیکن دراصل روم میں واقع ہے جو اٹلی کا دارالحکومت ہے۔1929ء میں اسے ایک خود مختار ملک کا درجہ دے دیا گیا تھا۔ مجسمہ آزادی کہاں سے آیا؟امریکہ کے مجسمہ آزادی کودوستی اور آزادی کی علامت سمجھا جاتا ہے۔یہ مجسمہ فرانس والوں نے امریکی عوام کو تحفے کے طور پر پیش کیاتھا۔یہ مجسمہ امریکیوں کی جنگ آزادی میں فرانسیسی عوام کے تعاون کی ایک یاد گار تھا۔یہ مجسمہ 1886ء سے نیویارک کی بندرگاہ پر نصب ہے۔ گولڈن گیٹ برج کس قسم کا پُل ہے؟امریکہ کی ریاست کیلی فورنیا میں واقع گولڈن گیٹ برج ایک معلق پُل ہے۔اس قسم کے پُل دونوں طرف بنے ہوئے مضبوط میناروں میں لگے ہوئے فولادی تاروں کے ذریعے معلق ہوتے ہیں۔میناروں کے درمیان گولڈن پُل کی لمبائی 4200فٹ (1280میٹر) ہے۔ اِسکی ساخت اور اِس کے محل وقوع نے اسے امریکہ کے مشہورترین مقامات میں شامل کر دیا ہے۔ بحری جہاز نہر پانامہ سے کیسے گزرتے ہیں؟نہر پانامہ بحرالکاہل اور بحراو قیانوس کو ایک دوسرے سے ملاتی ہے۔یہ وسطی امریکہ کے ملک پانامہ کے ایک سِرے سے دوسرے تک بہتی ہے۔نہر میں جگہ جگہ پانی کے بہت بڑے بڑے ٹینک بنے ہوئے ہیں جنہیں لاک (Lock)کہا جاتا ہے۔یہ لاک مختلف بلندیوں کے پانیوں کو آپس میں ملا سکتے ہیں۔جب کوئی جہاز کسی لاک میں داخل ہوتاہے تو اس میںاضافی پانی چھوڑ دیا جاتا ہے۔ پانی کی سطح بلند ہونے سے جہاز بھی اوپر کو اٹھ جاتے ہیں۔نہر پانامہ میں جہاز اس لئے اٹھائے جاتے ہیں تاکہ وہ گاٹون جھیل کو عبور کر سکیں۔ جھیل نہر کے درمیان میںہے اور اس کی سطح دونوں طرف کے سمندروں کی سطح سے اونچی ہے۔ سب سے بڑی آبشار دنیاکی سب سے بڑی آبشار جنوبی امریکہ میںہے۔ وینز ویلا میں دریائے چورون پر واقع اینجل فالزنامی یہ آبشار 3,212فٹ (979میٹر )کی بلندی سے گرتی ہے۔ یہ آبشار جنگلوں سے ڈھکے ہوئے گرم خطے میںواقع ہے جہاں بارشیں کثرت سے ہوتی ہیں۔1937ء میں جیمزاے اینجل نامی ایک امریکی پائلٹ کو ہنگامی حالت میں اپنا جہاز ان جنگلوں میں اتارنا پڑا تھا اس طرح یہ آبشار اس نے دریافت کی۔اسی پائلٹ کے نام پر اس کا نام اینجل فالز رکھا گیا۔ اِیسٹر آئی لینڈکا راز :اِیسٹرآئی لینڈ بحرالکاہل کے انتہائی جنوب میں بہت دور ایک چھوٹا ساجزیرہ ہے۔ جزیرے پر سینکڑوں کی تعداد میں پتھروں کے مجسّمے موجودہیں۔ان مجسّموں کے بارے میں آج تک پتہ نہیں چل سکا کہ یہ اس جزیرے پر کہاں سے آئے اور انہیں کیوں بنایا گیا۔ اسوان ڈیم کیوں بنایا گیا؟مصر کا بیشتر حصہ ریگستان پر مشتمل ہے لیکن دریائے نیل کے کناروں پر زرخیز زمین ہے جہاں کاشت ہوتی ہے۔ماضی میں کئی مرتبہ ایساہوا ہے کہ دریائے نیل میںپانی بہت کم ہو جاتا تھا اور کبھی اتنی شدید بارشیں ہوتیںکہ دریا کا پانی سیلاب کی صورت میں کناروں میں بہہ نکلتا۔اس صورتحال سے بچنے کے لئے دریائے نیل کے بالائی حصے میں اسوان کے مقام پر ایک بہت بڑا بند تعمیر کیا گیا۔بارشوں کے موسم میں پانی اس بند میں ہی جمع رہتا ہے اورنیل میں سیلاب نہیں آتا۔جبکہ خشک موسم میں اس بند سے دریائے نیل میں پانی چھوڑ دیا جاتا ہے تاکہ کاشت کار اس سے کھیتی باڑی کر سکیں۔ ٭…٭…٭