کامران کی بارہ دری

کامران کی بارہ دری

صدیوں بعد بھی یہ بارہ دری دیکھنے والوں کو اپنے حسن سے حیران کردیتی ہے۔ دریا کے اندر موجود ہونے کی وجہ سے اسے دریائے راوی کی انگوٹھی کا نگینہ اور دریا کے سینے میں دھڑکتا ہوا دل بھی کہا جاتا ہے۔ یہ بارہ دری مغل شہنشاہ ظہیر الدین محمد بابر کے بڑے بیٹے کامران مرزا نے بنوائی تھی اس لئے اسے کامران کی بارہ دری کہا جاتا ہے۔ یہ بارہ دری دراصل اس خوبصورت اور وسیع العریض باغ کا حصہ ہے جو 1530ء سے 1540 کے دوران کامران مرزا نے بنوایا تھا۔ اسے لاہور میں مغلوں کی تعمیر کی جانے والی پہلی عمارت بھی قراردیا جاتا ہے۔ کہا جاتا ہے کہ یہ باغ اتنا وسیع تھا کہ اس میں دیوان عام و خاص‘ زنانہ محلات‘ فوارے اور محرابیں وغیرہ بھی تھیں۔

http://cdn.trt.net.tr/images/9a1b/5a...971f4203d7.jpgکامران مرزا فنون لطیفہ‘ شاعری‘ تعمیرات اور باغات کا دلدادہ تھا۔ شہنشاہ بابر کی وفات کے بعد جب لاہور اس کے قبضے میں آیا تو اس نے دریائے راوی کے پار ایک شاندار عمارت اور وسیع و عریض باغ بنوایا۔ کامران کی طرح کئی وزراء اور امراء نے بھی دریا کے پار بڑے عالیشان باغ لگوائے۔ یہ محلات اور باغ شاہدرہ کے گرد و نواح میں تھے یہی وجہ ہے کہ شاہدرہ میں کھجور کے درخت بکثرت پائے جاتے ہیں جوان باغات کی یاد دلاتے ہیں۔ یاد رہے کہ اس وقت دریائے راوی قلعہ کی دیوار کے ساتھ بہتا تھا اور اس وقت دریا کامران کی بارہ دری سے کئی سو میٹر دور تھا۔http://cdn.trt.net.tr/images/3265/7d...9720246fc5.jpgکامران مرزا نے بارہ دری اور باغ میں شعر و سخن کی کئی محفلیں اور ضیافتیں منعقد کیں‘ کامران کے علاوہ ہمایوں اور شہنشاہ جہانگیر نے بھی کئی مرتبہ یہاں قیام کیا اور کئی اہم محفلیں یہاں منعقد کیں۔ شہنشاہ جہانگیر اپنے سفر کشمیر کے دوران یہاں پڑاؤ کیا کرتا تھا۔ اس نے اپنے بیٹے خسرو کی بغاوت کچلنے کی مہم کی کی نگرانی اسی مقام سے کی تھی اور اس کے باغنی بیٹے کو پا بہ زنجیر اسی جگہ پیش کیا گیا تھا۔ کامران مرزا نے شیر شاہ سوری سے مفاہمت کی غرض سے اس کے نمائندے کو اسی باغ میں دعوت دی اور جشن کی صورت میں اس کی خوب آئو بھگت کی تھی۔ مغلوں کے حسن ذوق اور ان کے یہاں قیام سے اندازہ کیا جا سکتا ہے کہ یہ باغ اور یہاں کی عمارات کس قدر خوبصورت اوردلکش ہوں گی۔ دارالشکوہ کی کتاب ’’سکینتہ الاولیاء‘‘ میں یہاں ایک بہت بڑے حوض اور دلکش عمارت کا ذکر ملتا ہے۔دریا سے فواروں اوردیگر عمارات کے آثار بھی ملے ہیں۔ اس بارہ دری کا ذکر ایک انگریز افسر تھامس تھارنٹن کے 1860ء میں لکھے گئے خطوط میں بھی ملتا ہے۔http://cdn.trt.net.tr/images/9b7e/4f...972174549f.jpgکامران مرزا مغلیہ سلطنت کے بانی شہنشاہ ظہیر الدین بابر کا دوسرا بیٹا تھا جو شہنشاہ بابر کی دوسری بیوی گل رخ بیگم کے ہاں 1509ء میں کابل افغانستان میں پیدا ہوا۔ وہ مغل سلطنت کے وارث نصیر الدین ہمایوں کا سوتیلا بھائی تھا جبکہ بابر کا تیسرا بیٹا عسکری مرزا کامران مرزا کا سگا بھائی تھا۔ شہنشاہ ہمایوں کامران مرزا کے لئے نرم گوشہ رکھتا تھا۔ اس نے فراخ دلی سے کامران کو لاہور کا وسیع علاقہ دیا لیکن کامران مرزا ہمیشہ ہمایوں کا دشمن بنا رہا۔ کامران مرزا کی بغاوت کی وجہ سے ہمایوں پر اپنے باغی بھائی کو سزائے موت دینے کا شدید دبائو تھا لیکن وہ اس پرآمادہ نہ ہوا۔ آخر شدید دبائو اور سلطنت میں مخالفت اور بغاوت پھیلنے کے خدشے کے پیش نظر وہ اس بات پر قائل ہو گیا کہ کامران کوکچھ سزا ضرور دی جائے جس پر کامران کواندھا کردیا گیا۔ اس کے بعد ہمایوں نے اسے حج کے لئے مکہ مکرمہ بھجوا دیا جہاں 5 اکتوبر 1557ء کو کامران مرزا کا انتقال ہو گیا۔http://cdn.trt.net.tr/images/2548/c9...972279906d.jpgبادشاہ محمد شاہ کے دور میں جب عالمگیری بند کی وجہ سے دریائے راوی کا رخ قلعہ سے شاہدرہ کی جانب مڑ گیا تو اس باغ کی بربادی کا دور شروع ہو گیا۔ سکھوں کے دور تک باغ کے ساتھ ساتھ اس کی عمارتیں بھی دریا برد ہونے لگیں۔ آج صرف یہ بارہ دری آخری یادگار کے طور پر موجود ہے۔ 1916ء تک بارہ دری دریائے راوی کے دائیں کنارے پر تھی جبکہ 1955ء تک یہ دریا کے وسط میں آ گئی جوشاید اپنے بنانے والوں کی سچی لگن اور جذبوں کی بدولت دریا کی لہروں کا مقابلہ کر رہی ہے۔بارہ دری کو محفوظ بنانے کے لئے 1977ء میں اس کے گرد پشتہ تعمیر کیا گیا۔ 1986ء میں اس وقت کے وزیراعلی پنجاب اور موجودہ وزیراعظم پاکستان میاں محمد نواز شریف نے یہاں کا دورہ کیا تو اس اہم قومی و ثقافتی ورثے کی حفاظت کے لئے ہرممکن اقدام کرنے کے احکامات جاری کئے تھے۔ ایل ڈی اے کے ڈائریکٹر جنرل بریگیڈئر (ر) منظور ملک اور ماہر آثار قدیمہ ولی اللہ خان کی کوششوں سے بارہ دری کواس کی اصل شکل میں لانے کی کوششوں کا آغاز ہوا۔ ملک بھر سے کاری گر اور ماہر بلائے گئے۔ قدیم باغ کے آثار ڈھونڈے گئے۔ فوارے لگائے گئے اور بارہ دری کو اس کی اصل صورت میں بحال کیا گیا۔ سیاحوں کی سہولت کے لئے یہاں مغلیہ طرز کا ریسٹورنٹ بھی بنایا گیا۔ پورے جزیرے کو سیلاب سے محفوظ رکھنے کے لئے 19 فٹ اونچا پختہ پشتہ بھی تعمیر کیا گیا۔ تزئین نو اور آرائش و زیبائش کے بعد 21 دسمبر 1989ء کو اس کا افتتاح ہوا۔http://cdn.trt.net.tr/images/d18f/29...971d99a68a.jpgکشتیوں کے ذریعے دریائے راوی پار کرکے بارہ دری پر آنے والے اس کے حسن‘ دلکشی اور سحر آفرینی سے متاثر ہوئے بغیر نہیں رہ سکتے۔٭٭٭