ye mizaaj-e-yaar ko kyaa huaa, unheN mujhse pyaar hai aaj-kal

ye mizaaj-e-yaar ko kyaa huaa, unheN mujhse pyaar hai aaj-kal
merii guftaguu, mirii justajuu, mira intezaar hai aaj-kal

tire Khat nikaal ke dekhna, kabhii chuumna, kabhii sochna
yahii mashgala, yahii silsila, yahii kaar-o-baar hai aaj-kal

na akela ghar se nikal miyaaN, zara dekh-bhaal ke chal miyaaN
baRhii abtarii, baRhii, rahzanii, baRhii luuT_maar hai aaj-kal

ise qatl kar use qatl kar, tujhe saat Khuun maaf haiN
tirii saltnat, tiraa dabdaa, tirii iqtidaar hai aaj-kal

are "Kaif" kal to tuu rind thaa, mire yaar tujh ko ye kyaa huaa?
baRha mazHabi, baRha paarsaa, baRha deen_daar hai aaj-kal

"Kaif" Bhopali