sada-e-dil na sunooN aur Khudi ko maar dooN kya?

sada-e-dil na sunooN aur Khudi ko maar dooN kya?
yeh ik libaas jo hai jism par, utaar dooN kya?

bahut se log tamaashaaii ban ke aaye haiN
tujhe dubone se pahle zaraa ubhaar dooN kya?

ye Zindagi hii mira aakhri asaasa hai
ise bhi daao pe rakh dooN, ise bhi haar dooN kya?

too meri baat na kah paaya apne lafzoN meN
ab apna tarz-e-takallum bhii kuchh udhaar dooN kya?

maiN aisa aks nahiiN chaahta hooN chehre ka
bura na mane agar aaiina, saNwaar dooN kya?

miri sadaa se pighalne lagi hai tanhaaii
sukoot-e-shab meN tira naam phir pukaar dooN kya?

ye zindagi jo tire saath "Shaad" rah na saki
tire baGhair ise raaigaaN guzaar dooN kya?