kaisi hi museebat ho baRhe shauq se aaye

kaisi hi museebat ho baRhe shauq se aaye
kam_zarf ke ehsaan se Allaah bachaaye

maiN aaj naye azm se par tol raha hooN
koii meri parwaaz ki raahoN meN na aaye

phooloN ko to sar khoob chaRhata hai zamaana
hai koii jo kaaNToN ko bhii seene se lagaaye

daaman ka kabhii Gham hai kabhii fikr-e-gharebaaN
ham hosh meN aaye bhii to kyaa hosh meN aaye

jis shaakh ne aaghosh meN kaliyoN ko khilaaya
us shaakh ne phooloN ke janaaze bhii uThaaye

rahta hai ''Hafeez'' ahl-e-takabbur se gurezaaN
is shaayar-e-maGhroor ko munh kaun lagaaye

"Hafeez" Merathi