voh hamsafar tha magar us se hamnavaaii na thee

voh hamsafar tha magar us se hamnavaaii na thee
ke dhoop chhaaoN ka aalam rahaa, judaaii na thee

na apna ranj, na auroN ka dukh, na tera malaal
shab-e-firaq kabhi ham ne yooN ganvaaii na thee

muhabbatoN ka safar is tarha bhi guzra thaa
shikasta dil the musaafir, shikasta_paaii na thee

adaavateiN theeN, taGhaful tha, ranjisheiN theeN magar
bichhaRhne vaale meN sab kuchh thaa, bevafaaii na thee

bichhaRhte vaqt un aankhoN meN thee hamaari Ghazal
Ghazal bhi voh jo kisii ko abhii sunaaii na thee

kabhii ye haal ke donoN meN yak-dili thee bahut
kabhii ye marhala jaise ke aashnaaii na thee

ajeeb hotii hai raah-e-sukhan bhii dekh "Naseer"
vahaaN bhii aa gaye akhir jahaN rasayi na thee

Naseer Turabi