tajassus se jhalak mahboob kii dekhii nahiiN jaatii

tajassus se jhalak mahboob kii dekhii nahiiN jaatii
dikhaa detii hai qismat hii kabhii dekhii nahiiN jaatii

muhabbat ek nemat hai, jise qudrat ataa kar de
ki is meN kamtari-o-baRhtari dekhii nahiiN jaatii

qayaamat kal kii aatii aaj aa jaaye to raazii hooN
Khudaa shaahid hai furqat kii ghaRhii dekhii nahiiN jaatii

muhabbat meN ajal ko aah se behtar samajhta hooN
magar tauheen-e-rasm-e-aashiqii dekhii nahiiN jaatii

Daraa hooN is qadar naakaami-e-ummeed se apnii
vo ab Khush haiN, magar unkii Khushii dekhii nahiiN jaatii

ilaahii shikva-e-bedaad se maiN baaz aataa hooN
ki mujh se to nigaah-e-multajii dekhii nahiiN jaatii

yah kah kar daavar-e-mahshar ne mujh ko ai ''Duaa'' baKhsha
ki is kambaKht kii tar_daamanii dekhii nahiiN jaatii