lagaao dil pe ko_ii aisaa zaKhm-e-kaarii bhii
lagaao dil pe ko_ii aisaa zaKhm-e-kaarii bhii
ki bhool jaaye ye dil aarzoo tumhaarii bhii
rah-e-talab meN mayassar kise mataa-e-shakeb
par apne dil ko nahiiN raas aah-o-zaarii bhii
Gham-e-firaaq kii tamheed ke liye kam hai
guzaar dooN tirii qurbat meN umr saarii bhii
kabhii to husn-e-talaafii kii soorateN socho
tumhaare paas nahiiN harf-e-Gham_gusaarii bhii
kabhii to Doob ke dekho ki deedaa-e-tar ke
samaNdaroN se jhalaktii hai be_kinaarii bhii
muhabbatoN se shanaasa Khudaa tumheN na kare
ki tumne dekhii nahiiN dil kii be_qaraarii bhii
na sah sakoge talavvun_mizaajiyaaN apnii
ki itanii sahal nahiiN hai ab vafaa_shiaarii bhii
sajaao apne laboN par vo mash'al-e-paimaaN
ki aaye merii taraf roshanii tumhaarii bhii
shab-e-firaaq meN ab tak hai yaad shaam-e-visaal
gurez-paa thii muhabbat se ham_kinaarii bhii
sadaaeN degaa lahoo dil kii dhaRhkanoN kii tarah
rahaa sukoot agar baam-o-dar pe taarii bhii
Irfaana Azeez
Re: lagaao dil pe ko_ii aisaa zaKhm-e-kaarii bhii
Re: lagaao dil pe ko_ii aisaa zaKhm-e-kaarii bhii
