Dil ke dariya ko kisii roz utar jaanaa hai
Itnaa be simt na chal, lauT ke ghar jaanaa hai
us tak aatii hai to har chiiz Thhahar jaatii hai
jaise paanaa hii use asl meN mar jaanaa hai
bol ai shaam-e-safar rang-e-rihaa’ii kyaa hai
dil ko ruknaa hai ke taaroN meN Thahar jaanaa hai
kaun ubharte hue mahtaab kaa rastaa roke
us ko har taur su-e-dasht-e-sahar jaanaa hai
maiN khilaa huuN to isii Khaak meN milna hai mujhe
vo to Khushbuu hai, use agle nagar jaanaa hai
vo tire husn kaa jaaduu ho ke meraa gham-e-dil
har musaafir ko isii ghaaT utar jaanaa hai
