درخورِ قہر و غضب جب کوئی ہم سا نہ ہوا

[intelligent086]

درخورِ قہر و غضب جب کوئی ہم سا نہ ہوا
پھر غلط کیا ہے کہ ہم سا کوئی پیدا نہ ہوا
بندگی میں بھی وہ آزادہ و خودبیں ہیں، کہ ہم
الٹے پھر آئے، درِ کعبہ اگر وا نہ ہوا
سب کو مقبول ہے دعویٰ تری یکتائی کا
روبرو کوئی بتِ آئینہ سیما نہ ہوا
کم نہیں نازشِ ہمنامئ چشمِ خوباں
تیرا بیمار، برا کیا ہے؟ گر اچھا نہ ہوا
سینے کا داغ ہے وہ نالہ کہ لب تک نہ گیا
خاک کا رزق ہے وہ قطرہ کہ دریا نہ ہوا
نام کا میرے ہے جو دکھ کہ کسی کو نہ ملا
کام میں میرے ہے جو فتنہ کہ برپا نہ ہوا*
ہر بُنِ مو سے دمِ ذکر نہ ٹپکے خونناب
حمزہ کا قِصّہ ہوا، عشق کا چرچا نہ ہوا
قطرے میں دجلہ دکھائی نہ دے اور جزو میں کُل
کھیل لڑکوں کا ہوا، دیدۂ بینا نہ ہوا
تھی خبر گرم کہ غالبؔ کے اُڑیں گے پرزے
دیکھنے ہم بھی گئے تھے، پہ تماشا نہ ہوا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔
*کام کا ہے مرے وہ فتنہ کہ برپا نہ ہوا (نسخۂ حسرت، نسخۂ مہر)


Dar khore qaher-o-gazab, jab koi hum sana hua
Phir galat kaya hai ki hum sa koi paida na hua
Bandagi mein bhi who azadah wo khud bin hai ki hum
Ulte phir aye, dare kaba agar wa na hua
Sab ko maqbool hai dawa teri yaktai ka
Robaro koi bute aiena seema na hua
Kam nahin nazish hunami chashm khoban
Tera bimar, bura kaya hai, gar achcha na hua
Seene ka dag hai, woh nalah kab tak na gaya
Khak rizq hai, woh qatrah ki dariya na hua
Nam ka mere hai jo dukh ki kisi ko na mila
Kam mein mere hai, jo fitna ki barpa na hua
Her bine mo se dame zikr na tapke khonab
Hamzah ka qissa hua, ishq ka charcha na hua
Qatre mein dariya dikhai na de aur juzo mein kul!
Khail ladjon ka hua, dedai bena na hua
Thi khabar garm ki Ghalib ke udenge purze
Daikhne hum bhi gai thai, pa tamasha na hua